«Գլաձոր» համալսարանի լրագրության բաժնի առաջին կուրսեցի Անի Ազիզյանը երազում է հաղորդավարուհի դառնալ, սակայն նրա երազանքը կարող է կիսատ մնալ, քանի որ համալսարանում իրեն ու իր կուրսեցիներին առաջարկում են տեղափոխվել այլ ֆակուլտետ։
Պատճառաբանությունը սա է՝ ինքնաֆինանսավորվող համալսարանը չի կարող 3 հոգու տված վարձավճարով կուրս պահել։
Համալսարանի ռեկտոր Ժորա Ջհանգիրյանի խոսքով՝ այս տարի ժուռնալիստիկայի ֆակուլտետի դիմորդների թիվը քիչ է եղել ու իրենք ստիպված են առաջին կուրսեցիներին առաջարկել այլընտրանքային տարբերակ՝ տեղափոխվել այլ ֆակուլտետ կամ սովորել որևէ այլ բուհում։
Արդեն մի քանի օր է, ինչ ուսանողները համացանցում փնտրում են ցանկացած համալսարանի լրագրության բաժին դիմած ու չընդունված դիմորդների, որպեսզի կարողանան շարունակել սովորել ու ստանալ լրագրողի մասնագիտությունը.
Կարդացեք նաև
«Մենք, իրոք, ուզում ենք դառնալ լրագրող ու մեզ այս ֆակուլտետն է հետաքրքիր, դրա համար էլ երբ պարոն Ջհանգիրյանն առաջարկեց տեղափոխվել այլ ֆակուլտետ, որոշեցինք հայտարարություն տալ, գտնել այնպիսի ուսանողների, ովքեր դիմել ու չեն ընդունվել որևէ բուհի լրագրության ֆակուլտետ։ Փորձում ենք ամեն ինչ անել, որ մեր կուրսը չփակվի»,- «Ա1+»-ի հետ զրույցում պատմում է առաջին կուրսի ուսանողուհի Ռուզաննա Զախտերյանը։
Ուսանողները ռեկտորից խնդրել են իրենց մեկ շաբաթ ժամանակ տալ, որպեսզի կարողանան մարդկանց գտնել. «Եթե չկարողանանք գտնել, ստիպված բանասիրության ֆակուլտետում կսովորենք, սակայն մենք ուզում ենք մասնագիտանալ լրագրության ոլորտում»,-ասում են նրանք։
Մանրամասները՝ սկզբնաղբյուր կայքում:
