Խորհրդարանի այսօրվա նիստում քվեարկության դրվեց ԿԳՄՍ նախարար Արայիկ Հարությունյանի հետագա պաշտոնավարման հարցը վարչապետի քննարկմանն առաջարկելու մասին ԱԺ նախագիծը, որը հեղինակել է «Լուսավոր Հայաստան» խմբակցությունը:
Մինչեւ քվեարկելը «Լուսավոր Հայաստան»-ի պատգամավոր Էդմոն Մարուքյանը խորհրդարանի նախագահից հետաքրքրվեց՝ Արայիկ Հարությունյանն ինչո՞ւ չի եկել, նա չպե՞տք է ներկա լիներ հարցի քվեարկությանը: Արարատ Միրզոյանը պատասխանեց. «Նախարարը կապ է հաստատել իմ հետ. ասել եմ, որ գալու կարիք չկա՝ հարցի ցանկացած լուծման դեպքում: Նրան գործից կտրելն այս սեպտեմբերյան օրերին համարել եմ ոչ նպատակահարմար»:
Ապա «Բարգավաճ Հայաստանի» պատգամավոր Իվետա Տոնոյանը հիշեցրեց երեկ հարցի քննարկման ժամանակ Արայիկ Հարությունյանի՝ Գագիկ Ծառուկյանի մասին արված ակնարկը, դրան հաջորդած քննարկումները եւ գրառումները. «Դրանք որակում ենք ոչ կոռեկտ եւ բարեկրթության սահմաններն անցնող: Ինչ վերաբերում է այս նախագծին, ապա Արայիկ Հարությունյանի պաշտոնավարման նպատակահարմարությունը չենք տեսնում: Նա աչքի է ընկել տրանսգենդերների հետ կրթության նրբությունները քննարկելով: Միանալու ենք «Լուսավոր Հայաստանի» հարցապնդմանը»:
Կարդացեք նաև
Այնուհետեւ «Իմ քայլը» խմբակցության ղեկավար Լիլիթ Մակունցն ասաց. «Ամիսներ շարունակ սուտ տեղեկատվություն տարածողները բարեկրթության մասին գնահատական տալիս առաջնահերթ պետք է գնահատական տան կոնկրետ մի պատգամավորի՝ Գեւորգ Պետրոսյանին, ով առհասարակ որեւէ բարեկրթության նորմ չի պահպանում՝ տարածելով սուտ եւ կեղծ տեղեկատվություն»:
ԿԳՄՍ նախարար Արայիկ Հարությունյանի հետագա պաշտոնավարման հարցը վարչապետի քննարկմանն առաջարկելու մասին ԱԺ նախագծին «կողմ» քվեարկեց 35, եւ «դեմ»՝ 84 պատգամավոր. որոշումը չի ընդունվել:
Լիլիթ Մակունցի խոսքերին արձագանքեց «Բարգավաճ Հայաստանի» պատգամավոր Արման Աբովյանը. «Գեղեցիկ չէ գործընկերների մասին կարծիք հայտնելը, երբ քննարկվող հարցը ոչ մի առնչություն չուներ Գեւորգ Պետրոսյանի հետ»:
Լուիզա ՍՈՒՔԻԱՍՅԱՆ
