Քիչ առաջ «Արմավիր» ՔԿՀ-ից տեղեկացրին, որ 4-րդ մասնաշենքի բողոքի ցույց կազմակերպած դատապարտյալ եւ կալանավորված անձանց հանդիպել է ՔԿՀ-ի պետ Արտակ Ղազարյանը։ Հիշեցնենք, անազատության մեջ գտնվողները հինգշաբթի առավոտվանից հրաժարվել են ճաշերից, իրենց ներքնակները խցերից հանել են դուրս՝ պահանջելով ուղարկել առաջնագիծ։ Նրանք միաժամանակ իրենց դիմումների պատասխաններն են ուզում, որոնցով ցանկություն են հայտնել մեկնել առաջնագիծ։
Արտակ Ղազարյանը զրուցել է նրանց հետ, բացատրել ստեղծված իրավիճակը եւ առաջարկել դիմում գրել ՀՀ վարչապետին, ու ինքը անձամբ հետամուտ կլինի հստակ պատասխան ստանալուն։ Բողոքի ցույց անող անձանց հետ այս պահին հանդիպում է նաեւ ՔԿԾ սոցիալական, հոգեբանական եւ իրավական աշխատանքների բաժնի պետ Ծովինար Թադեւոսյանը։
Ի դեպ, ՔԿԾ–ից տեղեկացրել էին, որ «Պաշտպանության մասին», «Ռազմական դրության իրավական ռեժիմի մասին», «Զինվորական ծառայության եւ զինծառայողի կարգավիճակի մասին» օրենքներով, ինչպես նաեւ 2020 թվականի սեպտեմբերի 27-ի «ՀՀ-ում ռազմական դրություն հայտարարելու մասին» ՀՀ կառավարության N 1586-Ն որոշմամբ եւ պաշտպանության ոլորտի քաղաքականությունը մշակող լիազոր մարմնի կողմից ընդունված համապատասխան իրավական ակտերով Արցախյան ազատամարտին մասնակցելու ցանկություն հայտնած դատապարտյալների եւ կալանավորված անձանց զորակոչելու հնարավորության վերաբերյալ հատուկ իրավակարգավորումներ նախատեսված չեն։
Իսկ ՀՀ պաշտպանության նախարարության մամուլի խոսնակ Շուշան Ստեփանյանը մեր ունեցած հեռախոսազրույցում նշեց, որ ՔԿՀ-ներում պահվող անձանց առաջնագիծ զորակոչելու հարցը ՊՆ իրավասության սահմանում չէ։ «Այդ անձինք ունեն հատուկ կարգավիճակ ու կցագրված չեն զինկոմիսարիատներում»,–ասաց Շ․ Ստեփանյանը։
Կարդացեք նաև
Aravot.am-ը հարցում է ուղարկել ՀՀ դատախազություն՝ պարզաբանում ստանալու խնդրի վերաբերյալ։
Արմեն ԴԱՎԹՅԱՆ
