Ադրբեջանաթուրքական ահաբեկչության դեմ պայքարելիս նահատակվել է Շիրակի մարզի Ազատան համայնքի բնակիչ Սերոբ Մելքոնյանը։ Նա 31 տարեկան էր, կապիտան։ Ազատանի համայնքապետ Վարդան Իկիլիկյանն Aravot.am-ին պատմեց, որ բանակ զորակոչվելու ժամանակ Սերոբն իր դիմումի համաձայն մեկ տարի ծառայել է Վազգեն Սարգսյանի անվան ռազմական համալսարանում, այնուհետ որպես սպա երկու տարի ծառայել է բանակում։
«Ծառայեց, վերադարձավ, հետո որոշեց շարունակել ծառայությունը․ վերապատրաստվեց, կապիտանի կոչում ստացավ։ Այս պատերազմում կամավոր գնացողների շարքում էր, զորամասում հենց առաջինն ինքն էր ասել՝ ես կգնամ։ Քելբաջարում ռմբակոծել էին նրանց մեքենան։
Նրանք երեք եղբայր են, երեքն էլ ամուսնացած չեն, Սերոբն ավագն էր եղբայրներից։ Շատ լավ տղաներ են, հայրը մահացել էր մոտ երկու տարի առաջ։ Եղբայրներից մեկն էլ էր ռազմաճակատում՝ զորակոչել էին, եղբոր մահվան բոթը լսելով՝ նրա մարմինն էր փնտրում։ Երրորդ եղբայրն էլ տան է, իրենց տնտեսությամբ է զբաղվում․ մայրը վատառողջ է»,-ասաց Ազատանի համայնքապետը։
Հիշեցնենք, որ Ազատան համայնքը 5 հայորդիներ է կորցրել ադրբեջանաթուրքական ագրեսիան հետ մղելիս։
Կարդացեք նաև
Ազատան համայնքը իր էջում գրել է․ «Հերթական բոթը ռազմաճակատից Մելքոնյան Սերոբ
Խորը ցավով տեղեկացնում ենք, որ ադրբեջանական ագրեսիան հետ մղելիս զոհվել է Ազատան գյուղի բնակիչ,հավերժ հայրենիքի պաշտպան և հերոս Մելքոնյան Սերոբը։
Մեր խորը վշտակցությունն ենք հայտնում մեր զինվորի ընտանիքին։ Հավերժ փառք եւ խոնարհում…»։
Նունե ԱՐԵՎՇԱՏՅԱՆ
