«Զանգվածային լրատվության մասին» օրենքում փոփոխություններ կատարելու «Իմ քայլը» խմբակցության պատգամավորների հեղինակած նախագիծն, ըստ որի առաջարկվում է արգելել լրատվամիջոցներին անանուն աղբյուրներին հղում կատարել, խմբակցության ղեկավար Լիլիթ Մակունցը համարում է որակյալ լրատվական դաշտի ապահովմանը միտված նախագիծ։
Այսօր խորհրդարանում լրագրողների հետ ճեպազրույցում Լիլիթ Մակունցը լուրջ քննադատության արժանացած այս նախագծի մասին ասաց․ «Կան անանուն կայքեր, մենք նույնիսկ չգիտենք, թե այդ կայքերը որտեղից են ուղղորդվում, արդյոք դրանք ադրբեջանակա՞ն ուղղորդում ունեն, թե՞ ոչ։ Եվ եթե ձեզ չի անհանգստացնում ՀՀ տեղեկատվական անվտանգությունն ու ընդհանրապես անվտանգությունը, ապա մեզ անհանգստացնում է, եւ մենք դրանով փորձում ենք ապահովագրել նաեւ ձեզ»։ Թեմայի շուրջ այլ հարցերի տիկին Մակունցը հրաժարվեց պատասխանել։
Նելլի ԲԱԲԱՅԱՆ
