Մարտի 8-ին ընդառաջ Երևանի քաղաքապետարանի ֆինանսական աջակցությամբ «Էրեբունի» պատմահնագիտական արգելոց-թանգարանում տեղի ունեցավ «Կինը և Նոր Արմավիրի հնագիտական գանձերը» խորագիրը կրող ժամանակավոր ցուցադրության բացումը։ Ներկայացված իրերը պեղվել են Նոր Արմավիր գյուղի տարածքում՝ հայտնի հնագետ-ուրարտագետ Սիմոն Հմայակյանի գլխավորած արշավախմբի պեղումների շնորհիվ։ Թանգարանի հավաքածուն առաջին անգամ համալրված է ոսկե իրերով։
«Ցուցադրությունում ներկայացված են բազմաթիվ արժեքավոր իրեր, որոնք կարող են զարդարել ցանկացած հեղինակավոր թանգարան։ Ներկայացված են բազմաթիվ ոսկե ականջօղեր, արծաթե ապարանջաններ, սափորներ, կարասներ և այլ իրեր»,-Aravot.am-ի հետ զրույցում նշեց «Էրեբունի» պատմահնագիտական արգելոց-թանգարանի տնօրեն Միքայել Բադալյանը:
Կարդացեք նաև
Նրա խոսքով. «Պեղումների ընթացքում բացված կանանց թաղումները և դրանց ուղեկցող նյութերը մեծապես հարստացնում են մեր պատկերացումները Հին Հայաստանում կանանց, նրանց զարդերի և սոցիալական կարգավիճակի մասին»։ Ցուցադրությունն ավելի ընկալելի և հանրամատչելի դարձնելու համար օգտագործվել են հայերեն, անգլերեն, ռուսերեն լեզուներով և համապատասխան պատկերներով ու գրաֆիկական դիզայնով հագեցած գիտահանրամատչելի ցուցապաստառներ, նաև տեղադրվել են պեղումներից հայտնաբերված նմանօրինակներ՝ հատուկ տեսողության խանգարում ունեցող անձանց համար:
«Մեր գլխավոր առաքելությունը մարդկանց կրթելն է այնպիսի միջոցներով, որոնք նաև կլինեն հաճելի։ Փորձել ենք հնարավորինս ներդաշնակություն ստեղծել այս երկու սկզբունքը մեկտեղելու համար»,- ասում է Միքայել Բադալյանը։
Թանգարանում իր տեղն է գտել նաև ճարտարապետ, վերակազմող Ռուբեն Սարգսյանի կողմից արված ազնվական ուրարտուհու հագուստի վերակազմությունը։
Ցուցադրությունը կշարունակվի մինչև մայիսի 21-ը։
Մոնիկա ԳՐԻԳՈՐՅԱՆ
Լուսանկարները` Միքայել Բադալյանի ֆեյսբուքյան էջից
