«Լուսավոր Հայաստան» խմբակցությունը աղմկահարույց փաստաթղթի հետ կապված արտահերթ նիստ է հրավիրել:
Հիշեցնենք, որ կառավարության նիստում վարչապետի պաշտոնակատար Նիկոլ Փաշինյանը հաստատել էր, որ փաստաթուղթ կա ու ասել էր, որ ստորագրելու է այն, քանի որ բխում է ՀՀ շահերից:
Նիստի կանոնակարգով պատգամավորները չեն կարող վարչապետի պաշտոնակատարին հարցեր տալ, ուստի նրանք հարցերն ուղղում էին հիմնական զեկուցող Մարուքյանին:
Նաիրա Զոհրաբյանը հարցրեց՝ որտե՞ղ են պաշտոնակատարները. «Քիչ առաջ ԱԳ փոխնախարար Ավետ Ադոնցը հայտարարեց, որ մեր երկրի արտաքին գերատեսչությունն ընդհանրապես տեղյակ չէ այս գործընթացներից, ընդհանրապես տեղյակ չէ, թե ինչ փաստաթղթի մասին է խոսքը, ինչ են ստորագրելու: Նույն բանը ասաց ՀՀ նախագահը: Ուզում եմ գնահատեք այս իրավիճակը եւ ասեք՝ վարչապետի պաշտոնակատարը ո՞ւմ հետ պիտի քննարկեր այս փաստաթուղթը: Վստահ եմ՝ խորհրդարանական մեծամասնությունն էլ տեղյակ չէ, ինչպես տեղյակ չէր նոյեմբերի 9-ի փաստաթղթից: Միգուցե ֆուտբոլի ֆեդերացիայի հետ պիտի քննարկեր, կամ լողի ֆեդերացիայի: Չկա մեկը, որին մենք ադեկվատ հարցերն ուղղենք: Ի՞նչ ինստիտուտ է միանձնյա որոշումներ կայացնելու ու այդ որոշումները անընդհատ արդարացնելու ժողովրդի անունից 3 տարի: Ժողովուրդը որտե՞ղ է թույլ տվել ստորագրել նոյեմբերի 9-ի կամ այդ փաստաթուղթը»:
Կարդացեք նաև
Մարուքյանը համաձայնեց՝ իրազեկված չեն, խոսք են տվել ժողովրդին, որ ժողովրդի թիկունքում չի բանակցվի ու ստորագրվի որեւէ փաստաթուղթ, որը կապված է ՀՀ շահերի հետ, հիմա հենց այդ հարցն են քննարկում. «Լավ օրից չի, որ մենք ունենք այս կասկածները: Կարելի էր ԱԱԽ նիստ հրավիրել, հրավիրվեին բոլոր խմբակցություններից, ՀՀ նախագահին ու ասվեր՝ այս մասը գաղտնի է, այս մասն էլ չի հրապարակվել»:
Թագուհի Թովմասյանը հարցրեց. «Կա՞ն հստակ հայկական կողմից դրված նախապայմաններ, որ զորքերը պիտի հետ քաշվեն, նոր որեւէ փաստաթուղթ ստորագրվի: Այն, որ եկել ու ներխուժել են Գեղարքունիքում եւ այլուր ՀՀ պետական սահմանից ներս, նրանք հետ կգնան ստորագրումից առաջ: Մասնագետներ կներառվե՞ն հանձնաժողովում, թե՞ ոչ, փաստաթղթից չի հասկացվում, որ հասկանանք՝ մեր ազգային շահը այնտեղ ո՞վ է ներկայացնում: Ինձ համար ամենակարեւորը՝ զորքերը դուրս գան իմ հայրենիքից, այնտեղից, որտեղ անցել է իմ մանկությունը»: Մարուքյանը դեմ էր, որ հայրենիքը այսպես փոքրացնում են ու իրենց ծննդավայրն են համարում: Նրա խոսքով՝ Ջաբրայիլը մեր հայրենիքն է, կորցրել ենք, ի՞նչ է նշանակում Սյունիքի խնդիր, Տավուշի խնդիր, դա ՀՀ անվտանգության խնդիրն է:
«Իմ քայլը» խմբակցության պատգամավոր Բաբկեն Թունյանն ասաց, որ ինքը առաջին անգամ փաստաթուղթը տեսել է Միքայել Մինասյանի հրապարակմամբ եւ «Ժողովրդի» կայքում. «Երեկվանից հրապարակվում են մի շարք հրեշավոր սցենարներ՝ ինչ են պատրաստվում իշխանությունները հանձնել՝ սա, սա, սա…: Որպես ապացույց ու որպես հիմնավորող փաստ ներկայացվել է մի թուղթ՝ մի մասը ծածկած: Հիմա մի կողմ թողնենք՝ դրա հետ հավելված կա, չկա, կպարզաբանվի: Բայց այդ փաստաթուղթը հի՞մք է»:
Մարուքյանն ասաց, որ ինքը պրոբլեմն այնտեղ է տեսնում, որ մարդիկ սկսում են հավատալ այս տեղեկատվությանը ու դա պետական ինստիտուտներին չվստահելու հետ է կապված. «Ես առավոտվանից մի 100 զանգ, 200 նամակ եմ ստացել, որ մի բան արեք, հանձնեցին, երկիրը ծախում են: Ասում են՝ արեք գործողություններ՝ խփեք, վառեք, տրաքցրեք: Հասկանո՞ւմ եք այս թրենդները որտեղից է, որովհետեւ իշխանությունը չի կարողանում իր ժողովրդի հետ կոմունիկացվի»: Թունյանը շնորհակալ էր Մարուքյանին՝ հույս հայտնելով, որ նիստը պարզություն կմտցնի:
Հռիփսիմե ՋԵԲԵՋՅԱՆ
