Չնայած Հայաստանում տեղական ինքնակառավարման ոլորտում դրական զարգացումներին, քաղաքապետարանների լիազորությունները չեն ընդլայնվել, հանրային ծառայություններ մատուցելու գործում նրանց դերը մնում է սահմանափակ, և տեղական ինքնակառավարման մարմիններին չի տրամադրվում բավարար ֆինանսավորում: Այս մասին ասվում է Եվրոպայի խորհրդի տեղական և տարածաշրջանային իշխանությունների կոնգրեսի զեկույցում:
Զեկույցը, որը հիմնված է 2019թ. մայիսին Հայաստան կատարած այցի հիման վրա, ողջունում է այն փաստը, որ Հայաստանը վավերացրել է Տեղական ինքնակառավարման եվրոպական խարտիայի բոլոր դրույթները: Այն նաև ողջունում է համայնքների խոշորացումը և կառավարության կողմից օրենսդրական նախաձեռնությունները ՝ կապված տեղական հանրաքվեների, հանրային լսումների և քաղաքապետարաններին տրվող ֆինանսական օգնության հետ:
Չնայած այս լավ զարգացումներին՝ քաղաքապետարանների լիազորություններն ու պարտականությունները չեն ընդլայնվել այնպես, որպեսզի նրանց թույլատրվի ղեկավարել հանրային գործերի զգալի մասը իրենց իսկ պատասխանատվության ներքո:
Բացի այդ, կենտրոնական կառավարության և քաղաքապետարանների միջև չկա իրավաբանորեն երաշխավորված խորհրդատվության ընթացակարգ, տեղական ինքնակառավարման մարմինները պատշաճ կերպով ներգրավված չեն իրենց ֆինանսների վերաբերյալ որոշումների կայացման գործընթացում, և տեղական համայնքների հետ չեն խորհրդակցում իրենց սահմանների փոփոխության վերաբերյալ:
Կարդացեք նաև
«Մեզ տեղեկացրել են, որ վերջին խոշորացման գործընթացում տեղական որոշ իշխանություններ և բնակիչներ մամուլից են իմացել իրենց համայնքների խոշորացման մասին», – ասել է զեկուցողներից Գուն Մարիթ Հելգեսենը՝ նշելով, որ արդյունավետ տարածքային բարեփոխումների վերաբերյալ լայն հաղորդակցությունը «Հայաստանում դեռ բացակայում է»:
Կոնգրեսն առաջարկել է, որ Հայաստանի կառավարությունն ապահովի, որ տեղական իշխանություններն ունենան հասանելիություն ֆինանսական ռեսուրսների, ապակենտրոնացնել պարտականությունները՝ բարձրացնելու այն հասարակական գործերի մասնաբաժինը, որոնք կարգավորվում և ղեկավարվում են տեղական ինքնակառավարման մարմինների: Բացի այդ, պետք է վերանայվեն և հստակեցվեն քաղաքապետարանների «սեփական» իրավասությունները, պետական վերահսկողությունը սահմանափակվի օրինականության հսկողությամբ և բարելավվի քաղաքապետարանի աշխատողների աշխատանքային պայմանները:
Պատրաստեց՝ Վիկտորյա ԱՆԴՐԵԱՍՅԱՆԸ