«Ձեր ակտիվ մասնակցությամբ 2013թ․-ի նախագահական ընտրությունները կեղծվել են: Սա 2013թ․-ի սեպտեմբերի 10-ին ԱԺ-ում Նիկոլ Փաշինյանն է ասել ձեզ։ Հարցս հետեւյալն է․ պարոն Մուկուչյան, 2013թ․-ի նախագահական ընտրությունները կեղծվե՞լ էին, թե ոչ»,-ՍԴ նիստում այսօր պատասխանող կողմ հանդիսացող ԿԸՀ նախագահ Տիգրան Մուկուչյանին հարցրեց «Զարթոնք» ազգային քրիստոնեական կուսակցության գործադիր մարմնի ղեկավար Արա Զոհրաբյանը։ «Ոչ, կեղծիք չի եղել»,-պատասխանեց Տիգրան Մուկուչյանը:
Արա Զոհրաբյան-Ե՞րբ եք վերջին անգամ Նիկոլ Փաշինյանի հետ կապի մեջ եղել՝ հանդիպում, հեռախոսի միջոցով:
Տիգրան Մուկուչյան-Երբեք չեմ եղել։ Ոչ էլ խոսել եմ։
Արա Զոհրաբյան-Այս տարի մամուլում հրապարակում եղավ այն մասին, որ ձեր եւ Նիկոլ Փաշինյանի միջեւ վեճ ու քաշքշուկ է եղել։
Կարդացեք նաև
Տիգրան Մուկուչյան-Բացարձակ։ Լկտի սուտ է:
Արա Զոհրաբյան– Ինչո՞ւ չեք միջամտել, երբ Փաշինյանը նման հռետորաբանությամբ քարոզչություն էր անում։
Տիգրան Մուկուչյան-Այդ հարցին պատասխանել եմ. միջամտության այն ձեւը, որն ուներ հանձնաժողովը, վերջինս արտահայտել է։
Հիշեցնենք, որ ՍԴ-ն այսօր միասնական վարույթում շարունակում է քննել ընդդիմադիր քաղաքական ուժերի՝ «Հայաստան» եւ «Պատիվ ունեմ» դաշինքների, «Զարթոնք» եւ «Հայոց հայրենիք» կուսակցությունների՝ հունիսի 20-ի ընտրությունների արդյունքները վիճարկող դիմումները:
Լուիզա ՍՈՒՔԻԱՍՅԱՆ
