Նորընտիր պատգամավոր Արա Մելիքջանյանն այսօր, Ազգային Ժողով ոտք դնելուն պես, դիմում է ներկայացրել «Իմ քայլը» խմբակցությունից դուրս գալու համար։ Նա «Իմ քայլը» խմբակցության ղեկավար Լիլիթ Մակունցին ուղղված իր դիմումը հրապարակել էր ֆեյսբուքյան էջում։
Արա Մելիքջանյանն Aravot.am-ի հետ զրույցում ասաց․ «Ես հայտարարել էի, որ Ազգային Ժողովի պատգամավոր դառնալուն պես՝ առաջին քայլս կլինի դուրս գալ «Իմ քայլ»-ը խմբակցությունից, խոստմանս տերը եղա։ Այսօր երդմնակալությունից հետո էլեկտրոնային դիմումը ուղարկել եմ քարտուղարության պետին։ Ես կուզենայի ավելի երկար տևեր իմ պատգամավորական գործունեությունը՝ լիքը ասելիք ու անելիք կար, բայց դե՝ ո՛չ սրանով է սկսվում, ո՛չ էլ ավարտվում, հիմա ավելի շատ անելիքներ կան՝ անկախ նրանից՝ Ազգային ժողովում ես, թե հասարակական սեկտորում կամ զուտ սովորական քաղաքացի ես՝ քո բարձր իրավագիտակցությամբ»։
Արա Մելիքջանյանն ասաց, որ տևական ժամանակ է՝ չի կիսում «Իմ քայլ»-ի գաղափարները։ «Շատ ու շատ հարցերում համոզմունքների, պատկերացումների ու մոտեցումների էական տարբերություններ կան»,- ասաց նա։
Հիշեցնենք, որ ՀՀ Կենտրոնական ընտրական հանձնաժողովը Արա Մելիքջանյանին 7-րդ գումարման ԱԺ-ում պատգամավորական մանդատ տրամադրել էր Լուսինե Եգանյանի լիազորությունները դադարեցնելուց հետո։ Արա Մելիքջանյանը «Իմ քայլը» կուսակցությունների դաշինքի ընտրական ցուցակի հաջորդ թեկնածուն էր։
Կարդացեք նաև
Արա Մելիքջանյանը թավշյա հեղափոխությունից հետո, մոտ 9 ամիս զբաղեցնելով Շիրակի փոխմարզպետի պաշտոնը, հրաժարական էր ներկայացրել։
Իսկ արտահերթ խորհրդարանական ընտրություններում նա սատարում էր Ռոբերտ Քոչարյանի գլխավորած «Հայաստան» դաշինքին՝ նշելով․ «Այո՛, սատարել եմ, բայց պիտի ասեմ, որ ես ո՛չ նիկոլական եմ եղել, ո՛չ քոչարյանական, ես ոչմեկական չեմ եղել, եթե կարիք է եղել՝ ելնելով ինչ-որ արժեքներից, իմ պատրաստակամությունն եմ հայտնել որևէ կերպ սատարելու, և դա չի կարող բնութագրվել ինչ-որ մեկական»։
Նունե ԱՐԵՎՇԱՏՅԱՆ
Երբ «քաղաքական գործիչը» «մեկ գիշերվա» ընթացքոում մի թիմից վազում է մեկ այլ, որևէ կասկած չի մնում շարժառիթների վերաբերյալ, առավել ևս, եթե նա վազել է «Հայաստան»: