Այս տարվա սեպտեմբերի 8-ի նիստում ԱԺ-ն հավանության արժանացրեց 441 համայնքի միավորում նախատեսող նախագիծը: Համաձայն նախագծի, առաջիկայում նախատեսվում է Լոռու մարզի 15 գյուղերը եւս միավորել՝ դարձնելով մեկ փունջ: Այդ համայնքների թվում է նաեւ Մարգահովիտը։ Իսկ համայնքային կենտրոն դառնալու է Փամբակ համայնքը, որը Մարգահովիտից հեռու է 30 կմ:
Մինչդեռ, Մարգահովիտ համայնքի բնակիչները դեմ են համայնքների խոշորացման ծրագրին. «Ինչ ուզում են, էդ էլ անում են: Ո՞վ ա հիմա տեր ու տիրականը: Էնա մնումա գլուխ առնենք, կորչենք ստեղից ու պրծնենք: Էլ անելու բան չկա»:
3600-ից ավելի բնակիչ ունեցող Մարգահովիտը կմիանա 380 բնակիչ ունեցող Փամբակին: Կառավարության նախագծով ազգային փոքրամասնություններով բնակեցված գյուղերը չեն խոշորացվելու։ Իսկ Մարգահովիտը միակ գյուղն է, որ գտնվում է 2 մոլոկանաբնակ գյուղերի միջեւ: Բացի այդ, համաձայն խոշորացման չափորոշիչների՝ տվյալ համայնքը պետք է խոշորացվող համայնքի հետ ունենա վարչական սահման, սակայն Մարգահովիտը Փամբակի հետ վարչական սահման չունի:
Կարդացեք նաև
Իսկ համայնքում հանրային լսումեր այս գործընթացի հետ կապված չեն եղել. «Մարգահովիտում նույնիսկ նշանակված էր ՏԻՄ ընտրություններ հոկտեմբերի 13-ին, թե 14-ին: Հետո այդ գրությունը չեղարկվեց եւ այդ գրության հիմքով հետաքրքրվեցինք եւ իմացանք, որ ընդգրկված է Փամբակ փնջում: Նախագիծը դրված է եղել օգոստոսի 13,14-ից, բայց մեզ հատուկ գրությամբ տեղեկացրել են օգոստոսի վերջին: Հանրային լսումներ չեն արել եւ բնակիչների մասնակցային կառավարման իրավունքն է խախտվել: Բացի այդ, խախտվել է նաեւ խոշորացման հայեցակարգը,- լրագրողների հետ զրույցում ասաց համայնքապետարանի ներկայացուցիչ Էմիլիա Մարտիրոսյանը:
Այժմ համայնքապետարանում ստորագրահավաք է անցկացվում՝ բնակիչներն իրենց անհամաձայնությունն են հայտնում սպասվող խոշորացմանը: Արդեն 600 մարգահովիտցի իր բողոքի ձայնն է բարձրացրել. «Մենք հիմա համայնքում ձայներ ենք հավաքում, որ դեմք ենք: Մենք մեծ համայնք ենք, թող մեզ միացնեն: Ստեղից էնտեղ ո՞ւր գնանք, ո՞ւր գանք, թող մեզ միանան»,- ասում են բնակիչները:
Տաթեւիկ ՂԱԶԱՐՅԱՆ
