Կապան համայնքի ավագանու ընտրություններում առաջադրվելիք քաղաքական ուժերի կողմից թիվ 35 տարածքային ընտրական հանձնաժողով անհրաժեշտ փաստաթղթերի ներկայացման վերջնաժամկետը հոկտեմբերի 10-ի ժամը 18.00-ն էր։ Եվ այսպես, նոյեմբերի 14-ին կայանալիք ընտրություններին մասնակցելու են երկու կուսակցություն՝ «Շանթ դաշինք» ազգայնական եւ «Քաղաքացիական պայմանագիր» կուսակցությունները։
«Շանթ դաշինք»-ի 70 հոգանոց ցուցակը գլխավորում է Կապանի գործող համայնքապետ Գեւորգ Փարսյանը։ Երկրորդ հորիզոնականում համայնքապետի տեղակալ Մեսրոպ Արզումանյանն է, իսկ ցուցակի 3-րդ համարը՝ «Վորլդ Վիժն Հայաստան» Կապանի տարածքային ծրագրի համակարգող Անուշ Մեժլումյանն է։ «Շանթ դաշինք»-ի ցուցակի առաջին եռյակի թեկնածուները անկուսակցականներ են։
Կարդացեք նաև
«Քաղաքացիական պայմանագիր» կուսակցությունը ներկայացրել է 61 հոգանոց ցուցակ։ Այն գլխավորում է Ազգային ժողովի պատգամավոր Դավիթ Դանիելյանը։ Նրան հաջորդում են Սյունիքի մարզպետարանի ֆինանսական եւ սոցիալ-տնտեսական զարգացման վարչության պետ Նարեկ Դավթյանը եւ Կապանի բժշկական կենտրոնի թերապեւտ Նարինե Գրիգորյանը։ Երեք թեկնածուներն էլ իշխող կուսակցության անդամներ են։
Թեկնածուների գրանցումը կկատարվի մինչեւ հոկտեմբերի 15-ը, իսկ նախընտրական քարոզարշավը՝ հոկտեմբերի 20-ից մինչեւ նոյեմբերի 12-ն է։
Նշենք, որ ավագանու բազմամանդատ ընտրություններ Կապանում անցկացվելու է առաջին անգամ։
Արմեն ԴԱՎԹՅԱՆ
