Տավուշի մարզի Բերդ համայնքի ղեկավար Հարություն Մանուչարյանին (լուսանկարում) մեկ ամսով կալանավորելու որոշում է կայացվել:
Երևանի Աջափնյակ և Դավթաշեն ընդհանուր իրավասության դատավոր Գևորգ Պողոսյանը Մանուչարյանին մեկ ամսով կալանավորելու որոշում է կայացրել Քրեական օրենսգրքի 308-րդ հոդվածի 1-ի (պաշտոնեական լիազորությունները չարաշահելը) և 314-րդ մասին 1-ի մասերի հատկանիշներով (պաշտոնեական կեղծիքը) առաջադրված մեղադրանքի հիմքով։
News.am-ի հետ զրույցում Մանուչարյանի պաշտպան Արման Թամրազյանը տեղեկացրել է, որ ըստ առաջադրված մեղադրանքի՝ Հարություն Մանուչարյանի որդին՝ Անուշավան Մանուչարյանը 5500 մետր սեփականության իրավունքով իրեն պատկանող հողամասի հենապատ կառուցելու ընթացքում հենապատը մի քանի մետր հայտնվել է համայնքային հողում, որի մասին Բերդ համայնքի ղեկավարը տեղեկացել է 2020 օգոստոսի 27-ին: 2020 թվականին Մանուչարյանի դեմ հարուցվել է վարչական վարույթ, սակայն պատերազմի հետևանքով այն կասեցվել է և քրեական պատասխանատվության ենթարկելու վաղեմության ժամկետները լրացել են, սակայն վարույթն իրականացնող մարմինը Մանուչարյանի նկատմամբ խափանման միջոց ընտրելով կալանավորումը՝ մեկ ամիս ժամկետով կալանավորել է վերջինիս:
Ըստ պաշտպանի՝ քննչական կոմիտեն Բերդ համայնքի ղեկավարին քրեական պատասխանատվության ենթարկելու անհագ ցանկություն է ունեցել, և քննություն է կատարել Հարություն Մանուչարյանի պաշտոնավարման ընթացքում նրա գործունեությանն առնչվող բոլոր ոլորտներում։
Կարդացեք նաև
Թամրազյանը նշել է, որ համայնքապետին կալանավորել են այն հիմնավորմամբ, թե Հարություն Մանուչարյանը 2018 թվականի հունվար ամսից իմացել է, որ իր որդին ապօրինի կառուցապատում է իրականացնում, բայց դրա վերաբերյալ դատարանին ոչ մի ապացույց չի տրամադրել։
Պաշտպանի խոսքով՝ Բերդ համայնքի ղեկավարին կալանավորելը իշխանությունների կողմից կիրառված պատիժ է, քանի որ Մանուչարյանը 2020 հունիսի խորհրդարանական ընտրությունների ժամանակ գործող իշխանություններին չի հարել։
Թամրազյանը առաջին ատյանի որոշում է բողոքարկելու է Վերաքննիչ դատարանում:
Սաթենիկ ՀՈՎՍԵՓՅԱՆ
