Ազգային ժողովի լիագումար նիստում այսօր առաջին ընթերցմամբ քննարկվում էր «Հարկային օրենսգրքում փոփոխությունների մասին» կառավարության հեղինակած նախագիծը, որով, հիշեցնենք, մինչեւ 2024 հունվարի մեկը կերկարաձգվի բացառապես էլեկտրական շարժիչով աշխատող տրանսպորտային միջոցների՝ մեծ/միջին/փոքր ավտոբուսների, մարդատար մեքենաների, մոտոցիկլետների եւ մոպեդների ներմուծման/օտարման համար գործող արտոնության ժամկետը։
ՔՊ-ական պատգամավոր Էդուարդ Աղաջանյանի արտահայտած կարծիքը նախագծի առնչությամբ չվրիպեց «Հայաստան» խմբակցության պատգամավորների ուշադրությունից։ Նա, այդ թվում հետևյալ բնորոշումը տվեց․ «Երեք տարիների ընթացքում ներկրված մեքենաների թիվը կազմում է այն ժամանակահատվածը, երբվանից որ մենք ընդունել ենք օրենքը․․․Փաստացի կարելի է արձանագրել, որ մեր կողմից ընդունված օրենքը երեք տարի առաջ շատ կոնկրետ ազդեցություն է ունեցել գործարարների որոշումների կայացման վրա։ 5000 էլեկտրամոբիլը խոսուն թիվ է»։
ԱԺ տնտեսական հարցերի հանձնաժողովի անդամ, «Հայաստան» դաշինքի պատգամավոր Հռիփսիմե Ստամբուլյանը դիմեց Էդուարդ Աղաջանյանին․ «Ի գիտություն Էդուարդ Աղաջանյանի՝ այն նախագիծը մշակվել է դեռեւս նախորդ կառավարության օրոք․ Կարեն Կարապետյանն է այն մշակել։ Սա իսկապես շուկայում էլեկտրամոբիլների ներկրման խթանիչ մեխանիզմ է։ Շատ ուրախ եմ, որ ձեր կառավարությունը եւս հավանություն է տվել նախագծին, եւ այն մտել է ուժի մեջ 2019թ․-ին։ 2018թ․-ին ներդրվել է տասներկու էլեկտրամոբիլ, իսկ 2019-2021թթ․ ունեցել ենք բավականին աճ՝ մոտ 5200 էլեկտրամոբիլ։ Նախագիծն իսկապես աշխատող է»։
Ապա «Հայաստան» դաշինքից Արամ Վարդեւանյանը հայտարարեց․ «Նկատել եմ հետեւյալ օրինաչափությունը՝ ցանկացած բարեփոխում, որն ունենում է դրական եւ բացասական տարրեր, շատ հստակ հիշատակվում է, որ այն մշակվել է նախորդ իշխանության ժամանակ։ Իսկ այն նախագիծը, որը հանրությանը ներկայացնելու բացառապես դրական բաղադրիչ ունի, չեն ասում, որ նախորդ իշխանության ժամանակ է մշակվել։ Դա արդեն սովորույթ է, որը կայուն իրացնում է այս իշխանությունը»։
Կարդացեք նաև
Լուիզա ՍՈՒՔԻԱՍՅԱՆ
