Aravot.am-ի տեղեկություններով, «Հարավկովկասյան երկաթուղիներ» ՓԲԸ-ն դիմել է ոստիկանություն՝ տեղեկացնելով, որ Մեղրի համայնքի նախկին ղեկավարի կողմից «ՀԿԵ» ՓԲԸ-ին պատկանող անշարժ գույքը վաճառվել է այլ անձի։
Ոստիկանությունը պարզել է, որ Մեղրի համայնքի նախկին ղեկավար Արշավիր Հովհաննիսյանը հանդիսանալով իրավասու պաշտոնատար անձ, ՀՀ սեփականության իրավունքով պատկանող եւ «ՀԿԵ» ՓԲԸ-ին օգտագործման իրավունքով տրամադրված Մեղրի համայնքի Արաքսաշեն թաղամասի 5 հասցեի, անշարժ գույքի միավորի իրավունքի գրանցման վկայականում արտապատկերված 5 շինությունը՝ Մեղրի քաղաքի երկաթուղային կայարանի խանութը, որպես Մեղրի համայնքի Արաքսաշեն թաղամասի 6/16 հասցեում գտնվող համայնքային սեփականություն հանդիսացող հողամասում կառուցված ինքնակամ շինություն, 2016թ. ճանաչել է օրինական։ Այնուհետեւ այն համարելով որպես Մեղրի քաղաքային համայնքի սեփականություն 770.000 դրամով, առք ու վաճառքի պայմանագրով վաճառել է աճուրդում հաղթող ճանաչված Դ․ Թումանյանին։
Ոստիկանությունում նախապատրաստված նյութերն ուղարկվել են ՀՀ հակակոռուպցիոն կոմիտե:
Արմեն ԴԱՎԹՅԱՆ
Կարդացեք նաև
Լուսանկարում՝ Մեղրիի կայարանը
