«Թույլ տվեք շատ հստակ ասել, որ Եվրախորհրդարանը չի ճանաչել պատերազմի արդյունքները։ Մենք հստակ հայտարարել ենք, որ պատերազմը երբեք չի կարող համարվել ընդունելի լուծում»,-Եվրանեսթ խորհրդարանական վեհաժողովի հանձնաժողովների՝ Երեւանում ընթացող նիստերի ժամանակ այսօր հայտարարեց Եվրախորհրդարանի պատգամավոր Մարինա Կալյուրանդը(Էստոնիա)։
«Եթե իսկապես խոսում ենք երկարաժամկետ խաղաղության մասին, ապա դրան հնարավոր է հասնել բանակցությունների միջոցով՝ ԵԱՀԿ Մինսկի խմբի շրջանակում։ Պատերազմը լուծում չի։ Երկու կողմերն ասում են, որ գործողություններ են պետք, օրինակ՝ սահմանազատում եւ սահմանագծում։ Դրանք հենց այն փոքրիկ քաղաքական քայլերն են, որոնք հիմա պետք են, որպեսզի ամրապնդվի վստահությունը եւ փոխադարձ հարգանքը»,-նշեց Մարինա Կալյուրանդը։
Ապա նա երկու կողմերին կոչ արեց զերծ մնալ վիրավորական հռետորաբանությունից․ «Խոսքը թե երկրների ղեկավարների, թե խորհրդարանական ներկայացուցիչների մասին է։ Դա խանգարում է առաջ գնալուն։ Մենք, որպես եվրախորհրդարանի անդամներ, այստեղ ենք եկել ձեզ օգնելու եւ չենք կարող ձեր փոխարեն լուծել ձեր խնդիրները։ Դուք պետք է լուծեք խնդիրները, բայց մենք պատրաստ ենք օգնել, միայն թե ասեք՝ որտեղ»։
Լուիզա ՍՈՒՔԻԱՍՅԱՆ
