Արմեն Հովհաննիսյանին մեղադրանք է առաջադրվել այն բանի համար, որ նա 2014թ. նոյեմբերի 5-ից ՀՀ արդարադատության նախարարության քրեակատարողական վարչության պետի թիվ 478-Ա հրամանով զբաղեցնելով ՀՀ արդարադատության նախարարության «Նուբարաշեն» ՔԿ հիմնարկի հերթապահ խմբի առաջին կարգի մասնագետի պաշտոնը եւ հանդիսանալով պաշտոնատար անձ, 2018թ. մարտի 16-ին «Նուբարաշեն» ՔԿ հիմնարկի շենքում կատարած արարքի համար պատժելու նպատակով մի խումբ անձանց կազմում խոշտանգել է Արմեն Աղաջանյանին՝ վերջինիս դիտավորությամբ պատճառելով ֆիզիկական ուժեղ ցավ, ինչից հետո խոշտանգման դեպքը թաքցնելու խմբային շահերից ելնելով, մի խումբ պաշտոնատար անձանց կազմում կատարել է պաշտոնեական կեղծիք։ Արմեն Ջիվանի Հովհաննիսյանին մեղավոր ճանաչել ՀՀ քրեական օրենսգրքի 309-րդ հոդվածի 2-րդ մասով եւ 314-րդ հոդվածի 1-ին մասով նախատեսված արարքներում («Առավոտը» լուսաբանել է այս գործով մի քանի դատական նիստեր):
2019թ. նոյեմբերի 26-ի՝ Երեւան քաղաքի դատավոր Դ. Բալայանի դատավճռով, նրան վերջնական պատիժ էր նշանակվել ազատազրկում 4 տարի ժամկետով՝ պետական եւ տեղական ինքնակառավարման մարմիններում պաշտոններ զբաղեցնելու իրավունքի զրկմամբ երեք տարի ժամկետով: Արմեն Հովհաննիսյանի նկատմամբ կիրառվել էր 2018 թվականի նոյեմբերի 1-ին ընդունված «Էրեբունի-Երեւանի հիմնադրման 2800-ամյակի եւ Հայաստանի առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՕ-414-Ն օրենքի 2-րդ հոդվածի 1-ին մասի 1-ին կետը եւ այդ հիմքով նա ազատվել էր ազատազրկման ձեւով նշանակված պատժի հետագա կրումից: Գործը հասել էր Վճռաբեկ դատարան: Վճռաբեկ բողոքները բավարարվել էին մասնակիորեն: Արմեն Հովհաննիսյանի վերաբերյալ Երեւան քաղաքի առաջին ատյանի ընդհանուր իրավասության դատարանի՝ 2019 թվականի նոյեմբերի 26-ի դատավճիռն օրինական ուժի մեջ թողնելու մասին ՀՀ վերաքննիչ քրեական դատարանի` 2020 թվականի օգոստոսի 18-ի որոշումը բեկանվել էր եւ գործն ուղարկվել նույն դատարան՝ նոր քննության:
Վերաքննիչ քրեական դատարանը (նախագահությամբ՝ Մարաբյանի, դատավորներ Ազարյանի եւ Վարդանյանի) մարտի 9-ին որոշում կայացրեց իրավապաշտպան Արա Ղարագյոզյանի եւ դատախազ Վարդգես Սարգսյանի վերաքննիչ բողոքները բավարարելու մասին։
Ամբաստանյալ Արմեն Հովհաննիսյանը մեղավոր ճանաչվեց ՀՀ քրեական օրենսգրքի 309.1-րդ հոդվածի 4-րդ մասով նախատեսված հանցանք (խոշտանգում) կատարելու մեջ եւ նրա նկատմամբ նշանակվեց պատիժ՝ 7 տարի 6 ամիս ժամկետով ազատազրկում։
Ռուզան ՄԻՆԱՍՅԱՆ
Կարդացեք նաև
«Առավոտ» օրաթերթ
11.03.2022
Վերջապես խոշտանգման հոդվածով ունենք վճիռ, ՀՀ պատմության մեջ առաջինը, չնայած նրան որ Եվրոպական դատարանը 10 խոշտանգման գործ ունի ընդդեմ ՀՀ-ի, ներպետական դատարանները ամեն գնով խուսափում էին խոշտանգման հոդվածը կիրառել։ Այս գործով դատավոր Բալայանը խայտառակ վճիռ էր կայացրել որ ծեծը հոգեկան տառապանք չի առաջացնում ուրեմն խոշտանգում չէ․․․․ ավելի անամոթ ու լկտի վարքագիծ մարդու իրավունքների ոտնահարման հանդեպ դժվար է պատկերացնել։ Հուսով մեն ԲԴԽ-ն Բալայանին կկանչի գորգի վրա ու կբացատրի որ իր նամնները դատավորի օգնական էլ իրավունք չունեն աշխատելու