Ուկրաինայի նախագահ Վլադիմիր Զելենսկին հարցազրույց է տվել ռուսական լրատվամիջոցներին, որում խոսել է նաև Մոսկվայի կողմից հրապարակված փաստաթղթի մասին, որի համաձայն՝ իբր նախքան «Ուկրաինայում հատուկ գործողությունը» Զելենսկին պատրաստվում էր ուժով հետ գրավել Դոնբասը: Պաշտոնական Մոսկվայի հրապարակած փաստաթղթում նման որոշման տակ դրված էր Ուկրաինայի Ազգային գվարդիայի նախկին ղեկավար Միկոլա Բալանի ստորագրությունը:
«Դե, դա ինչ-որ կեղծ փաստաթուղթ է: Չի եղել: Իհարկե, որևէ ծրագիր չի եղել… Ես ասել եմ, որ մենք չենք պատրաստվում ռազմական ճանապարհով հետ վերցնել մեր տարածքները: Ես ուզում եմ ձեզ հետ պայմանավորվել: Ավելին, ես ցանկանում եմ գտնել ձևաչափ, որով կարելի է որոշակի ժամանակ ապրել: Ես ինչ-որ պահ ցանկանում էի Ուկրաինայի և Ռուսաստանի միջև հարաբերություններ ձևավորել՝ նախքան այս ներխուժումը: Ես միջոցներ էի փնտրում, հավատացեք ինձ…:
«Ես չգիտեմ դա ինչ փաստաթուղթ է: Ինձ համար ընդհանրապես դժվար է ասել: Եթե ես դա տեսած լինեի ՝ կպատասխանեի: 100%-ով կեղծ են այդ փաստաթղթերը, որոնցում ասվում է Դոնբասի վրա հարձակման մասին: Եվ ընդհանրապես, Ազգային գվարդիան, հա՞: Ազգային գվարդիայի նախկին ղեկավա՞րը: Միկոլա Բալա՞նը: Ախր նա դրա լիազորությունն անգամ չունի: Ազգային Գվարդիան, ինչպես գիտեք, մտնում է Ներքին գործերի նախարարության կազմում: Նշանակում է, ստորագրությունը պետք է լինի ներքին գործերի նախարարինը: Ներքին գործերի նախարարն ի՞նչ կապ ունի հարձակողական դիրքերի հետ: Զառանցանք է»,- ասել է Զելենսկին:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
