Տարիներ շարունակ Հայաստանը չի ճանաչել Արցախի անկախությունը, որպեսզի չխաթարի բանակցային գործընթացը, բայց հարցն այսօր հրատապություն է ստացել մի քանի պատճառներով, որոնցից հիմնականը Ադրբեջանի վարքագիծն է. ՀՀ ԱԺ-ի մոտ լրագրողների հետ զրույցում ասաց, «5165 շարժման» հիմնադիր Հովհաննես Ղազարյանը (լուսանկարում):
Ըստ բանախոսի՝ անկախ նրանից, որ ՀՀ իշխանությունը գնում է լուռ զիջումների, խոսում է խաղաղության՝ իր բնութագրմամբ, կեղծ օրակարգից, ինչը ընդունեց նաեւ Նիկոլ Փաշինյանը՝ կառավարության վերջին նիստում հայտարարելով, որ Ադրբեջանը շարունակում է Արցախում էթնիկ զտումները եւ Հայաստանի ու Արցախի վրա հարձակման հող է նախապատրաստում, Ադրբեջանը մեծացնում է իր ագրեսիան: Մինչդեռ ընդամենը հունվար ամսին Նույն Նիկոլ Փաշինյանը հայտարարում էր, որ խաղաղության օրակարգից մեզ ոչ ոք եւ ոչինչ չի կարող շեղել:
Բանախոսը նաեւ նկատում է՝ դիվանագիտական դաշտում մենք տանուլ ենք տալիս, մինչդեռ պատերազմն այժմ էլ դիվանագիտական դաշտում է շարունակվում:
Հովհաննես Ղազարյանը նաեւ հայտարարեց՝ ՀՀ իշխանությունը չի խոսում տարածքային հարցի մասին, խոսում է միայն Արցախի ժողովրդի իրավունքների մասին եւ այդ համատեքստում, միջազգային մամուլը գրում է, որ Հայաստանը հրաժարվում է Արցախի ինքնորոշման իրավունքից: Այս իրավիճակում, երբ Ադրբեջանը անգամ Լեռնային Ղարաբաղ տերմինի օգտագործման հետ է մեծ խնդիր տեսնում, երբ չի ընդունում ԵԱՀԿ Մինսկի խմբի համանախագահության առաքելությունը, Հայաստանին այլ բան չի մնում անել, քան ճանաչել ԱՀ-ն եւ միջնորդներից պահանջել, որպեսզի հետեւողական լինեն, քանի որ նրանք են եղել մինչ օրս քննարկված սկզբունքների երաշխավորը:
Կարդացեք նաև
«Այս իրավիճակում չճանաչել Արցախը, նշանակում է՝ ընդունել, որ Արցախը հայկական չի լինելու, նշանակում է՝ ճանապարհ բացել արցախցիների ցեղասպանության համար եւ Ադրբեջանի շարունակական ագրեսիայի դրսեւորումների, այս անգամ արդեն նաեւ Հայաստանի նկատմամբ»,- հայտարարեց Հովհաննես Ղազարյանը:
Երգիչ Արսեն Գրիգորյանն (Մրո) էլ հայտարարեց, որ այսօր Արցախում իրավիճակն ավելի վատ է, քան 1988-ին էր: Շարժման անդամները նորերս են վերադարձել Արցախից: Օրերս Փառուխում եւ Քարագլխի լեռնաշղթայում լարվածության աճի ժամանակ նրանք եղել են Արցախում: Նա հայ հասարակությանը, համայն աշխարհի հայերին կոչ արեց՝ արթնանալ, փրկել եւ տեր կանգնել Արցախին ու Հայաստանին: Հորդորեց՝ ինչպես 1988-ին, այնպես էլ հիմա՝ յուրաքանչյուր իր երկրում եւ իր տեղում պահանջատեր լինի:
Նելլի ԳՐԻԳՈՐՅԱՆ
