Aravot.am-ը ԿԳՄՍ նախարարությունից մեկնաբանություն էր խնդրել ՌԴ արտգործնախարար Սերգեյ Լավրովի` հայտարարության վերաբերյալ, որն արվել էր ՀՀ ԱԳ նախարար Արարատ Միրզոյանի հետ համատեղ ասուլիսի ժամանակ: Սերգեյ Լավրովը, մասնավորապես, ասել էր. «Մենք ի պատասխան Երևանի ցանկության՝ կաջակցենք հանրապետությունում ռուսական դպրոցների քանակի ավելացմանը, շահագրգռված ենք, որ ռուսերենը շարունակի աջակցություն ստանալ մեր ընկերների կառավարությունում»:
ԿԳՄՍ նախարարության հասարակայնության հետ կապերի եւ տեղեկատվության վարչությունից փոխանցեցին ԿԳՄՍ նախարարության դիրքորոշումը, որտեղ ասվում է. «Հայաստանում ռուսալեզու գործարար միջավայրի և ներդրումների ակտիվացման ֆոնին ակտիվացել է նաև ռուսալեզու քաղաքացիների ներհոսքը դեպի Հայաստանի Հանրապետություն:
Վերջիններիս առանձնահատուկ հետաքրքրում են Հայաստանում երեխաների ռուսալեզու կրթության հնարավորությունները: Հայաստանում կրթական և գործարար համապատասխան միջավայր ապահովելու նպատակով, ինչպես նաև վերլուծելով առկա իրավիճակը՝ առաջարկել ենք ՀՀ դպրոցներում, այդ թվում՝ ավագ մակարդակում, ընդլայնել ռուսերենով կրթություն իրականացնող դասարանների թիվն ըստ պահանջի: Այդ դասարանները նախատեսված են հիմնավորապես Ռուսաստանի Դաշնության, ինչպես նաև օտարերկրյա այլ քաղաքացիների համար:
Հայաստանի Հանրապետության կառավարությունը կարևորում է հանրակրթական դպրոցներում ռուսերենի ուսուցման որակի բարձրացումը: Այդ կապակցությամբ ռուսաստանյան կողմի հետ համագործակցության շրջանակում ՀՀ կրթության, գիտության, մշակույթի և սպորտի նախարարությունն ակնկալում է ստանալ անհրաժեշտ աջակցություն ՀՀ չափորոշիչներին համապատասխան ռուսերենով դասագրքերի բովանդակությունը մշակելու, ուսուցիչների վերապատրաստման ծրագիր կազմելու և վերապատրաստման դասընթացներն իրականացնելու համար»:
Կարդացեք նաև
Գոհար ՀԱԿՈԲՅԱՆ
