«Մեր ուսումնասիրությունները վկայում են, որ չկա որեւէ օրենք կամ կանոն, որ վարչապետին ուղեկցող ոստիկանության մեքենան չպետք է կանգնի եւ կարող են լքել վթարի վայրը»,-այսօր կառավարության նիստից հետո լրագրողների հետ ճեպազրույցում ասաց Մարդու իրավունքների պաշտպան Քրիստինե Գրիգորյանն՝ անդրադառնալով վարչապետ Նիկոլ Փաշինյանին ուղեկցող ոստիկանական ավտոշարասյան երիտասարդ հղի կնոջը՝ Սոնա Մնացականյանին վրաերթի ենթարկելուն, ինչի հետեւանքով կինը մահացել է։
Գրիգորյանը պատասխանելով հարցին՝ վարչապետի մեքենան էլ դեպքից հետո անցնում է եւ չի կանգնում, ասաց․ «Ես հետաքրքրվել եմ, վստահեցնում եմ, առնվազն ինձ տրված տեղեկությունների հիման վրա, վարչապետը տեղյակ չի եղել, չի ընկալել, թե ինչ է տեղի ունեցել։ Կորտեժը շատ արագ է անցել եւ որեւէ կասկած չունեմ, որ ուր էլ շտապելու լիներ վարչապետը` պետք է կանգներ, իջներ, առնվազն մարդասիրական մղումով»։
Պաշտպանը վստահեցրեց, որ հետեւելու է գործընթացին, որպեսզի մեղավորները պատժվեն։
Ապրիլի 26-ին Պարոնյան-Լեո փողոցների խաչմերուկում Սոնա Մնացականյանին վրաերթի ենթարկած ՃՈ ուղեկցող սպայական վաշտի հրամանատար Արամ Նավասարդյանին կալանավորելու դատախազի միջնորդությունը Երեւանի ընդհանուր իրավասության դատարանը մերժեց։
Կարդացեք նաև
Փաստաբան Րաֆֆի Ասլանյանն էլ հայտարարել է, որ այս դեպքով տուժող կողմը հետեւողական է լինելու Սոնա Մնացականյանի դաժան վրաերթի, անօգնական վիճակում թողնելու հանգամանքների բացահայտմանը։
Նելլի ԲԱԲԱՅԱՆ
