Գյումրիի Անի ու Ավստրիական թաղամասերի արանքում կկառուցվի նոր թաղամաս՝ երեք տիպի տներով, ամերիկյան արվարձանային բնակավայրերի նմանությամբ։
Ինչպես տեղեկանում ենք, այն լինելու է էկոթաղամաս և կոչվելու է Ամերիկյան։ Կայքէջում, որտեղ տեղադրված են լուսանկարներ կառուցվելիք թաղամասից, առանձնատներից ու մանրամասնված է կառուցապատման տեխնոլոգիան, օգտագործվող շինանյութի բաղադրությունը, սեյսմակայունությունը,անգամ գներն են հրապարկված, այն անվանված է «Ամերիկյան թաղամաս Գյումրիում»։
Տները նախատեսված են կառուցել կանադական կարկասային տեխնոլոգիայով, որով և աշխարհում առանձնատների մեծամասնությունն է կառուցվում։ Դրանք դիմանում են մինչև 9 բալ ուժգնությամբ երկրաշարժի։
Կառուցապատողը կայքի միջոցով տեղեկացնում է, որ տները կառուցվելու են SIP վահանակներից (structural insulated panel — կառուցվածքային իզոլացված վահանակ), ինչը ապահովում է ամրություն, էներգախնայողություն, արագ կառուցապատում։ SIP վահանակներից կառուցվում են թերմոս տներ։
Կարդացեք նաև
Կայէջից նաև տեղեկանում ենք, որ կառուցապատումն իրականացնելու է « Վեստ Հաուս» շինարարական ընկերությունը։
Գյումրու գլխավոր ճարտարապետ Հենրիկ Գասպարյանն Aravot.am-ի հետ զրույցում ասաց, որ տեղանքը ներդրողին առաջարկել է քաղաքապետարանը, հողահատկացում դեռ չի կատարվել, ընթացքի մեջ է, այս պահին չափագրման աշխատանքներ են ընթանում։
Կառուցապատողը, ըստ քաղաքապետարանի պաշտոնյայի, քաղաքապետարանին ներկայացրել է հիմնական կոնցեպտը, թե ինչ են նախատեսում կառուցելու։
Հենրիկ Գասպարյանն ասաց, որ քաղաքապետարանը մանրամասներ կհրապարակի նախագծի հաստատումից հետո։
Նունե ԱՐԵՎՇԱՏՅԱՆ
