ԲԴԽ-ն Վճռաբեկ դատարանի վարչական պալատի դատավորի թափուր տեղի համար առաջադրել էր Արթուր Առաքելյանի, Արա Բաբայանի եւ Արծրուն Միրզոյանի թեկնածությունները: ԱԺ արտահերթ նիստում պատգամավորերը փակ, գաղտնի քվեարկությամբ 68 մասնակիցներից բոլորը քվեարկել են Արծրուն Միրզոյանի օգտին: Մյուս թեկնածուները ստացել են զրո ձայն:
Վճռաբեկ դատարանի դատավորի թեկնածու է առաջադրվել Գեւորգ Գյոզալյանը: Նրա ելույթից հետո ՔՊ պատգամավոր Հերիքնազ Տիգրանյանը Գյոզալյանին հարցրեց. «Փաստաբանական համակարգի մասին ունեմ գործընկերային ջերմ վերաբերմունք, բայց վերջին շրջանում այպանվել ենք, որ գտնվում ենք այս քաղաքական թիմի մեջ: Նոյեմբերի 9-ից հետո մեր դեմ սկսվել է արշավ՝ մանդատները վայր դնելու, խմբակցությունից դուրս գալու վերաբերյալ եւ եղել են նաեւ ակցաներ, ստորագրահավաքներ, ուզում եմ իմանալ ձեր վերաբերմունքը նման ակցիաների մասին, արդյոք դուք էլ ստորագրե՞լ եք դրա տակ»:
Գյոզալյանը պատասխանեց, որ այդ հարցը բավականին ցավոտ է իր համար, 2007-ից արտոնագիր է ստացել ու Փաստաբանական պալատը հարազատ է իրեն, բայց վերջին տարիներին այն շեղվել է իր ընթացքից ու ավանդույթներից, որոնք դրվել են ի սկզբանե այդ պալատի հիմքում. «Ես նորմալ եմ համարում, որ փաստաբանը կարող է զբաղվել քաղաքական գործունեությամբ, առաջադեմ երկրներում էլ փաստաբանը կարող է հետագայում դառնալ նախագահ: Բայց ես աննորմալ եմ համարում, որ մասնագիտական կառույցը ղեկավարող անձինք՝ կլինի պալատի նախագահ, խորհրդի անդամներ, նրանք անմիջական զբաղվեն քաղաքականությամբ»:
Հռիփսիմե ՋԵԲԵՋՅԱՆ
