«Ես չեմ կարծում, թե Գագիկ Ջհանգիրյանը հրաժարական է տվել առողջական խնդիրների պատճառով: Հակառակը, վստահ եմ, որ Գագիկ Ջհանգիրյանի հրաժարականը կապված է բացառապես երկրում տիրող ներքաղաքական իրադարձությունների հետ: Հատկապես հենց ձայնագրության հրապարակումը ի ցույց դրեց, որ Հայաստանի Հանրապետությունը ոչ թե իրավական պետություն է, քաղաքական իշխանությունը ոչ թե զբաղված է երկրում օրենքի, իրավունքի գերակայության պահպանումով, այլ քաղաքական իշխանության իրավական մահակի ուղղահայացի կառուցմամբ:
Ով լինի Գագիկ Ջհանգիրյանի տեղը, լինելու է Նիկոլ Փաշինյանի բանտիկով անձնական մուրճը»,-այսօր «Հայելի» ակումբում ասաց փաստաբան Վահե Եփրիկյանը եւ շարունակեց. «Նշել եմ ուզում այն հանգամանքը, որ Ջհանգիրյանը ինքն է խոստովանում, թեեւ ավելի ուշ փորձեց տխրահռչակ հարցազրույցում որոշակի արդարացումներ գտնել, որ քրեական գործերի հարուցման եւ կարճման իմաստով, այդ գործընթացներով, այնուամենայնիվ, զբաղվել է, որ Հայաստանում քրեական գործերը հարուցվում եւ կարճվում են ոչ թե հանցակազմի առկայության հանցադեպի առկայությամբ, այլ քաղաքական իշխանության ցանկությամբ եւ որ Հայաստանի Հանրապետությունը արդեն չորրորդ տարին է գտնվում է տոտալ քաղաքական հետապնդումների հարթությունում եւ չորրորդ տարին է չկա արդարադատություն»:
Աշոտ ՀԱԿՈԲՅԱՆ
