Ազատ ոճի ըմբշամարտի Հայաստանի երիտասարդական հավաքականը Հռոմում անցկացված Եվրոպայի առաջնությանը մասնակցեց 10 մարզիկով, նվաճեց 3 ոսկե, 1-ական արծաթե եւ բրոնզե մեդալ եւ թիմային հաշվարկով զբաղեցրեց 2-րդ տեղը:
Այսօր հավաքականի ավագ մարզիչ Ավետիք Վարդանյանը, մարզիչ Արմեն Մալխասյանը, Եվրոպայի չեմպիոններ Հայկ Պապիկյանը, Մուշեղ Մկրտչյանը, Լյովա Գեւորգյանը եւ արծաթե մեդալակիր Հարություն Հովհաննիսյանը «Արմենպրես» պետական լրատվական գործակալությունում ամփոփեցին առաջնության արդյունքները:
Ավետիք Վարդանյանը նշեց, որ առաջնությունը մեր թիմի համար անցավ լավ, որ սպասում էին մեդալների: «Ունեցանք այն, ինչ ունենք այսօր: Սակայն ավելի լավ հանդես գալու հնարավորություն ունեինք: Հարություն Հովհաննիսյանը, թերեւս, եզրափակչում ավելորդ լարվածության պատճառով չկարողացավ չեմպիոնի կոչում նվաճել: Բրոնզե մեդալի համար Հայկ Աբրահամյանը, որը հաղթում էր վրացի մրցակցին, վերջին վայրկյանին 2 միավորանոց հնարք բաց թողեց ու պարտվեց 3:3 հավասար հաշվով»,- ասաց նա:
Հավաքականի 2-րդ մարզիչ Արմեն Մալխասյանը եւս նշեց, որ, ընդհանուր առմամբ, արդյունքը գոհացուցիչ է: «Բայց ամեն դեպքում ունեցանք տակտիկական սխալներ, որոնք հետագայում շտկելի են: Շարունակելու ենք աշխատել եւ շտկելով վրիպումները՝ լավագույն մասնակցություն ենք ունենալու հաջորդ մեկնարկներում»,-ասաց նա:
Կարդացեք նաև
Մարզիչները նշեցին, որ Ռուսաստանի եւ Բելառուսի բացակայությունը թեեւ որոշակիորեն զգացվեց, սակայն դրանից մրցակցությունն ամենեւին էլ չէր նվազել, որովհետեւ նման առաջնություններում թույլ ըմբիշներ չեն լինում եւ բոլորն էլ պայքարում են առավելագույնին հասնելու համար:
Բանախոսները նշեցին, որ առաջնությունում հիշարժան պահերի պակաս չի եղել, սակայն ամենահիշարժանը թիմային 2-րդ տեղը գրավելն է եղել, քանի որ դա թիմային աշխատանքի արդյունք ու գնահատական է: Ավետիք Վարդանյանը հիշեցրեց, որ նման արդյունք ոսկե մեդալների հաշվարկով վերջին անգամ եղել է 2018 թվականին: «Այն ժամանակ Ռուսաստանն ու Բելառուսը մասնակցում էին, եւ մենք զբաղեցրինք թիմային երրորդ տեղը»,- ասաց նա եւ բերեց մի հետաքրքիր վիճակագրություն: «Այս տարի Հռոմում 10 քաշային կարգերից երեքում մենք ենք հաղթել, իսկ պայքարի մեջ եղած մնացած երկրներից ոչ մեկը երկրորդ ոսկե մեդալ չի ունեցել: Այնպես որ, մեր համար նշանակություն չի ունեցել, թե որ երկրներն են մասնակցում եւ որոնք՝ ոչ: Մենք մեր պլանավորած նախապատրաստությունը՝ հավաքները, միջազգային մրցաշարերը անցկացրել ենք ու պատրաստ եղել պայքարի, անկախ նրանից, թե առաջնությունում ով կլինի եւ ով կբացակայի»,- ասաց նա:
Աշոտ ՀԱԿՈԲՅԱՆ