Ըստ մասնագետների՝ Հայաստանում ավելանում են COVID-ի դեպքերը: Մասնագետները միաժամանակ չեն բացառում նաեւ համավարակի նոր ալիքի հավանականությունը։
Լոռու մարզպետարանի առողջապահության վարչությունում նույնպես COVID հիվանդության սրացում են նկատում: Նախորդ շաբաթ Ստեփանավանի եւ Տաշիրի տարածաշրջաններից հիվանդներ են տեղափոխել Երեւան, որոնց անհրաժեշտ է եղել ստացիոնար բուժում:
Դրան զուգահեռ, սակայն մարզում նվազել է պատվաստվող ցանկացող քաղաքացիների թիվը: Մարզպետարանի առողջապահության եւ սոցիալական ապահովության վարչության պետ Ռուզաննա Պողոսյանի խոսքով՝ այս պահին ցածր է պատվաստում ցանկացող քաղաքացիների թիվը: Մասնագետն այն կապում է ամռան սեզոնի ու որոշ ժամանակով հիվանդության նվազման հետ. «Հիմնականում պետք է պատվաստում ստանան այն մարդիկ, ովքեր որ գտնվում են ռիսկի խմբում: Դա կլինի 65 տարեկանից բարձր ազգաբնակչությունը, դա կլինի տարբեր խրոնիկ հիվանդություններով տառապող անձինք, որոնց մոտ, որ հնարավոր է հիվանդության բարդ տեսակի հայտնաբերում: Եվ իհարկե, խուսափելով հատկապես մահացությունից՝ մենք առաջարկում ենք պատվաստվել եւ լինել ապահովագրված: Որովհետեւ պատվաստումը կարող է չկանխարգելել հիվանդության զարգացումը, բայց բարդ դեպքերի ու հատկապես մահացության դեպքերի հետ կապված մենք միանշանակ ասում ենք, որ կարեւորը պատվաստվելն է»:
Առաջին դեղաչափով պատվաստումների թիվը կազմում է 45.8 տոկոս, սակայն Պողոսյանի խոսքով՝ մինչ այս պահը պետք է ապահովված լինեին մինչեւ 70 տոկոս:
Կարդացեք նաև
Մարզում COVID-ով հիվանդների ընդհանուր թիվը կազմում է 25.457, իսկ առողջացածների թիվը՝ 24.818 է, գրանցվել է մահվան 583 դեպք, իսկ նախորդ շաբաթվա վերջի տվյալներով բուժում է ստանում 56 քաղաքացի:
Տաթեւիկ ՂԱԶԱՐՅԱՆ