Ռուսաստանի պաշտպանության նախարարությունը հայտնում է, որ ՌԴ ցամաքային զորքերի ստորաբաժանումները կմասնակցեն Հավաքական անվտանգության պայմանագրի կազմակերպության (ՀԱՊԿ) խաղաղապահ զորավարժություններին, որոնք կանցկացվեն Հայաստանում։
ՌԴ պաշտպանության նախարարության կայքում նշված է. «Միջազգային ռազմական համագործակցության շրջանակներում 2023 թվականին նախատեսվում է համատեղ վարժանքներ անցկացնել Ռուսաստանի Դաշնության Զինված ուժերի ցամաքային զորքերի և օտարերկրյա պետությունների ազգային բանակների ստորաբաժանումների հետ։
Ռուսաստանի Դաշնությունից դուրս Հայաստանի տարածքում կանցկացվեն ՀԱՊԿ խաղաղապահ զորամիավորումների «Անխորտակելի եղբայրություն-2023» համատեղ զորավարժություններ։
Ռուսաստանի Դաշնության ռազմական շրջանների զորավարժարաններում նախատեսվում է անցկացնել 8 երկկողմանի զորավարժություն՝
Կարդացեք նաև
ռուս-հնդկական միջտեսակային «Ինդրա-2023» զորավարժություններ,
ՇՀԿ (Շանհայի համագործակցության կազմակերպություն– ԽՄԲ.) անդամ երկրների «Խաղաղ առաքելություն-2023» համատեղ ռազմական հակաահաբեկչական հրամանատարաշտաբային զորավարժություններ,
ռուս-լաոսական համատեղ զորավարժություններ,
«Բարեկամություն-2023» ռուս-պակիստանյան համատեղ զորավարժություններ,
ռուս-ալժիրական համատեղ զորավարժություններ,
КСБР-ի (Հավաքական անվտանգության արագ տեղակայման հավաքական ուժերի Կենտրոնական Ասիայի տարածաշրջանի ստորաբաժանումների –ԽՄԲ.) հետ համատեղ «Սահման-2023» զորավարժություններ,
ռուս-մոնղոլական համատեղ զորավարժություններ «Սելենգա-2023»,
ռուս-վիետնամական համատեղ զորավարժություններ։
Զորավարժությունների ընթացքում կմշակվի ռազմական գործողությունների համատեղ պլանավորումը, շտաբի ներկայացուցիչների և մասնակից երկրների ցամաքային զորքերի ստորաբաժանումներ փոխգործակցության կարգը, ինչպես նաև պայմանական անօրինական զինված կազմավորումների վնասազերծման մարտավարական գործողությունները։
Զորավարժությունները կկրեն խաղաղապահ և հակաահաբեկչական բնույթ»:
