Ռազմական փորձագետ Հայկ Նահապետյանը «Հայելի» ակումբում մեկնաբանեց իր քաղաքացիներին Ռուսաստանի Դաշնությունից դուրս գալու ԱՄՆ-ի հորդորը: Ընդ որում, նման հորդոր արվել էր նաեւ 44-օրյա պատերազմից առաջ, Իրանի հետ կապված, Թուրքիայի երկրաշարժից առաջ:
«ՌԴ արտաքին հետախուզությունը հայտարարություն է տարածել ըստ որի իրենք գիտեն, որ Սիրիայի՝ Թուրքիայի վերահսկողության ճամբարներում պատրաստվել են մարտական փորձ ունեցող առնվազն վեց տասնյակ ահաբեկիչներ, որոնք գուցե նաեւ արդեն ՌԴ-ում են եւ ԱՊՀ երկրներում: Այդ ահաբեկիչների թիրախը պաշտոնական անձինք են, զինվորականները, հատուկ ծառայությունների աշխատողները, ռազմավարական նշանակություն ունեցող օբյեկտները: Եվ այդ անձինք միայն ՌԴ-ում չեն: Նրանք ԱՊՀ երկրներում են, այդ թվում՝ Հայաստանում: Ես ասում եմ վտանգի չափը:
Նպատակը ամենայն հավանականությամբ ոչ այնքան պաշտոնական անձինք են, որքան ռազմավարական նշանակության օբյեկտները: Օրինակ, զենքի արտադրության, քիմիական գործարաններ եւ այլն: Եվ պատահական չէ, որ այդ հայտարարությունից հետո Միացյալ Նահանգները դասվեց ահաբեկչական կազմակերպությունների շարքը: Առավել եւս, որ արեւմտյան տարբեր երկրների մասնագետներ արդեն իսկ փաստական ձեւով ապացուցել են, որ Հյուսիսային հոսք-1 եւ Հյուսիսային հոսք-2 գազամուղի պայթեցումները ուղղակիորեն Միացյալ Նահանգներն է կազմակերպել եւ հրամանը տվել է անձամբ ԱՄՆ նախագահը: Այսինքն, ԱՄՆ-ը կազմակերպում է ահաբեկչական գործողություններ՝ տարբեր երկրներում գազամուղեր պայթեցնելով, ռազմական կարեւորագույն օբյեկտների նկատմամբ հարձակումներ գործելով: Սրան էլ ավելացնենք, որ Ռուսաստանի Դաշնությունում մի քանի միլիոն Ուկրաինայի քաղաքացիներ են գտնվում, «սառեցված բջիջներ» կան, որոնք ուղղակի հրամանի են սպասում»,-ասաց նա:
Փորձագետը նշեց, որ ուկրաինական ռազմաճակատում Արեւմուտքի ակնկալիքները չեն արդարանում: Ուստի, հաշվի առնելով, որ ռազմաճակատում հետագա զարգացումների արդյունքները, Միացյալ Նահանգներն անցնում է իր պլան-Բ-ին՝ Ռուսաստանը ներսից քաոսի վերածելուն, Ռուսաստանի դաշնակից երկրներում եւս քաոս ու պատերազմներ հրահրելուն, որպեսզի Ռուսաստանը չկարողանա զարգացնել իր հաջողությունները Ուկրաինայում:
Կարդացեք նաև
«ԱՄՆ-ը չի բացառում, որ այդ ահաբեկչություններից կարող են տուժել նաեւ իր քաղաքացիները: Ընդ որում, խորամանկ ձեւով ներկայացրեց հորդորն իր քաղաքացիներին: Ասաց, որ սա ավելի շուտ վերաբերում է ՌԴ այն քաղաքացիներին, որոնք ունեն Ռուսաստանի եւ ԱՄՆ երկքաղաքացիություն, որ նրանք թող շուտ դուրս գան, քանի որ կարող է նոր զորակոչ լինել: Իսկ այդ մարդիկ լինելով նաեւ իրենց քաղաքացիներ, ցանկալի չէ, որ զորակոչվեն եւ Ուկրաինայում կռիվ տան»,- մեկնաբանեց Հայկ Նահապետյանը:
Աշոտ ՀԱԿՈԲՅԱՆ
