Ազգային ժողովի հերթական նիստում «Քաղաքացիական պայմանագիր» խմբակցության պատգամավոր Վահագն Ալեքսանյանն արձագանքեց ընդդիմադիր պատգամավորների հայտարարություններին։
«Այս հարցերը չէին տա մեր ընդդիմադիր գործընկերները, եթե այս բանակցությունները լինեին Մոսկվայում։ Բայց հատկապես ծիծաղելի է, թե ո՞նց է կարելի, երբ ամբողջ աշխարհի ու տեսախցիկների առաջ, մամլո հաղորդագրություններով բանակցում են, դուք ասում եք՝ ստվերային բանակցություններ են ընթանում հայ ժողովրդի թիկունքում։ Եթե ստվերային է, բա իրոք ստվերայինը ո՞րն է, պարոն Մանուկյան։ Կարո՞ղ է 2007 թվականի հայ-թուրքական բանակցություններն են, կարող է։ Հատկապես շատ հետաքրքիր է, որ ասում եք՝ Ռուբեն Ռուբինյանը Թուրքիայի գծով Հայաստանի բանակցողն է եւ, հետեւաբար, եթե մասնակցում է այս բանակցություններին, ուրեմն այստեղ կա նաեւ Թուրքիայի գործոնը, հետեւաբար այս ամենը Հայաստանը շաղկապում է իրար։ Ռուբեն Ռուբինյանը շաբաթվա մեջ հանդիպում է տասնյակ պատվիրակությունների՝ Հայաստանում ու Հայաստանից դուրս»,- ասաց Վահագն Ալեքսանյանը։
Ըստ պատգամավորի՝ Հայաստանը խորհրդարանական Հանրապետություն է, եւ խորհրդարանական Հանրապետությունում կա ԱԺ փոխնախագահ, ով մասնակցում է այդ բանակցություններին։ «Այստեղ խնդիրը ո՞րն է»,- հարցադրում արեց Ալեքսանյանը։
Ռոզա ՀՈՎՀԱՆՆԻՍՅԱՆ
