Մեկնաբան Արտյոմ Երկանյանը համոզված է, որ «Նեմեսիս» հուշարձանը միայն պատրվակ էր, որ Թուրքիան փակի իր օդային տարածքը երրորդ ուղղությամբ շարժվող հայկական թռիչքների համար:
«Վստահ եմ, որ սա նաեւ զուգադիպություն չէ, որ համընկել է Վաշինգտոնում ընթացող բանակցությունների հետ, որոնց ներկա է նաեւ Թուրքիայի հետ ՀՀ բանակցողը (խոսքը ՀՀ ԱԺ փոխնախագահ Ռուբեն Ռուբինյանի մասին է-խմբ.): Բանակցությունների սեղանին քննարկվում է նաեւ հայ-թուրքական հաշտեցման հարցը, յուրաքանչյուր գործոն Թուրքիան կփորձի օգտագործել որպես Հայաստանի վրա ճնշում բանեցնելու հնարավորություն: Այս դեպքում էլ օդային սահմանը փակելը այն բացառիկ ազդեցիկ գործիքներից մեկն է, ու եթե չլիներ «Նեմեսիս » հուշարձանը, իհարկե, այլ պատրվակներ կգտնեին: Բայց, իհարկե, ես շատ ուրախ եմ, որ հենց այս պատրվակն են գտել, ինչը մեզ հնարավորություն կտա աշխարհին ու Թուրքիային ցույց տալ, որ մեր արժանապատվությունից մտադիր չենք հրաժարվել ինչ-որ տնտեսական բոնուսների համար: Սա էլ ավելի տեսանելի կդարձնի հայերի արժանապատիվ լինելու հետեւողականությունը»,- Aravot.am-ին ասաց Արտյոմ Երկանյանը, որի նախապապերից մեկը՝ Արամ Երկանյանը, «Նեմեսիսի» վրիժառուներից էր:
Մեր զրուցակցի խոսքով՝ հուշարձանի տեղադրման գաղափարը 9 տարվա պատմություն ունի. «Տարբեր փուլերում արժանացել է ՀՀ ԱԳ նախարարության հավանությանը: Բնական է, որ համաձայնեցված է եղել արտաքին գործերի նախարարության հետ, եւ դրական եզրակացություն ստանալուց հետո միայն Երեւանի ավագանու 3 բոլոր խմբակցությունները ընթացք են տվել գործին: Ավագանու որոշումն էլ եղել է միաձայն: Այդ հուշակոթողը հավերժացրեց այն մարդկանց հիշատակը, որոնք ի կատար են ածել թուրքական, օսմանյան օրինական դատական ատյանի վճիռը: Աբսուրդային է, որ Թուրքիայի իշխանությունները ինչ-որ բողոք են ներկայացնում՝ հաշվի առնելով, որ հենց թուրքական օրինական դատական ատյանն է այդ որոշումը կայացրել: Այդ մարդիկ պատժել են մարդկանց, որոնք հանցավոր են ճանաչվել օսմանյան իշխանությունների դատարանի կողմից»:
Հիշեցնենք, որ ի պատասխան «Նեմեսիս» հուշարձանի տեղադրման Թուրքիան փակել է իր օդային տարածքը երրորդ ուղղությամբ շարժվող հայկական թռիչքների համար: Թուրքիայի արտաքին գործերի նախարարությունն էլ հայտարարել է, որ այդ քայլն անհամատեղելի է Թուրքիայի և Հայաստանի միջև հարաբերությունները նորմալացնելու գործընթացի ոգու հետ, ոչ մի կերպ չեն նպաստի տարածաշրջանում խաղաղություն և կայունություն հաստատելու ջանքերին:
Կարդացեք նաև
«Իհարկե, հուշակոթողը խոչընդոտ չէ այդ հարաբերություններին: Իրենց նպատակն է կա՛մ Հայաստանից ստանալ ինչ-որ զիջում ինչ-որ հարցում՝ բանակցությունների սեղանին, կամ հաշտվել, որ այդ զիջումը չի լինելու, ու ամեն ինչ շարունակվի իր հունով»,- նկատեց Երկանյանը:
Ինչ վերաբերում է հուշարձանի ապամոնտաժման պահանջին՝ Արտյոմ Երկանյանը հավելեց, որ հուշակոթողի տեղադրումը նպատակ ուներ ցույց տալու, որ մենք արժանապատիվ ազգ ենք. «Եթե թուրքերը փորձում են դրանում համոզվել, ապա մենք հնարավորություն կունենանք դա ապացուցելու»:
Արփինե ՍԻՄՈՆՅԱՆ
Լուսանկարը՝ Արտյոմ Երկանյանի ՖԲ էջից:
