Տավուշի մարզում շուրջ 100 շահառու բանկերի ու վարկային կազմակերպությունների միջոցով ծանոթացել են վարկավորման պայմաններին։ Այսօրվա դրությամբ, սակայն, տրամադրվել են 3 վարկերի 1-ին տրանշերը Ոսկեպար, Արծվաբերդ և Բերքաբեր գյուղերում։ Այսօրվա կառավարության նիստում տեղեկացրեց Տավուշի մարզպետ Վահե Ղալումյանն այն բանից հետո, երբ Նիկոլ Փաշինյանը ցանկացավ պարզել Հայաստանի սահմանամերձ գյուղերում պետության սուբսիդավորմամբ տների կառուցման ծրագրի ընթացքը:
«Այդ 3 գյուղում շինարարությունն ընթանում է։ Քաղաքացիները պատրաստվում են դիմել երկրորդ փուլին»,– ասաց Ղալումյանը` հավելելով, որ ևս 3 վարկ էլ հաստատվել է` 2-ը` Բերքաբերում, 1-ը` Կիրանցում։
Գեղարքունիքի մարզպետ Կարեն Սարգսյանը նշեց, որ Ճամբարակ խոշորացված համայնքի Վահան գյուղում 3 դիմող կա, որոնցից այս պահին դեռ 1-ն է շինթույլտվություն ստացել։
«Վայոց Ձորի մարզում աշխուժության կա, բայց թվաքանակը քիչ է։ Սահմանամերձ բնակավայրերի բնակիչներից այս պահին 4 հոգի է դիմել Արենի, Խաչիկ, Խնձորուտ և Գոմք համայնքներից»,– հայտնեց Վայոց Ձորի մարզպետ Արարատ Գրիգորյանը։
Կարդացեք նաև
Մյուս մարզերի վիճակագրությունը ներկայացրեց ՏԿԵ նախարար Գնել Սանոսյանը` տեղեկացնելով, որ Արարատի մարզում հայտ չկա, Սյունիքում 8 հայտ է եղել։
Նրա խոսքով` ծրագիրը դանդաղում է բանկերում գրավադրման հարցի պատճառով։ Խնդրի լուծման նպատակով նախարարությունը կառավարության որոշման նախագիծ է մշակել, որի միջոցով հույս ունեն` ծրագիրն ավելի կակտիվանա։
Նիկոլ Փաշինյանն առաջարկեց բանկերի հետ քննարկում կազմակերպել։
Լուսինե ՄԱՐԳԱՐՅԱՆ
