Այսօր Արաբկիր վարչական շրջանում բնակիչներից մեկը, տեսնելով «Ապրելու երկիր» կուսակցության անդամներին, հիշեց, որ կուսակցության նախագահ Մանե Թանդիլյանը եղել է պատգամավոր, աշխատանքի եւ սոցիալական հարցերի նախարար. «Ժամանակին դեպուտատ էր, դուրս եկավ, ասեց՝ առողջական խնդիրներ ունեմ: Հետո իմացանք՝ գնացել է Ղարաբաղ, նախարար էր աշխատում»:
Նրան մոտեցավ Մանե Թանդիլյանը, սեղմեց ձեռքն ու բնակչից լսեց՝ հիմա ո՞նց է ձեր առողջությունը, լա՞վ եք: Թեկնածուն պատասխանեց. «Հոյակապ, չեմ մահանա, թող ոչ մեկը հույս չունենա: Հիվանդները բուժվում են, չէ՞»: Բնակիչը բացատրեց, թե ինչ նկատի ուներ. «Սկզբում մտածեցինք հիվանդ եք, դուք ինքներդ ասեցիք, հետո տեսանք՝ Ղարաբաղում եք»:
Կարդացեք նաև
Մանե Թանդիլյանն արձագանքեց. «Լավ չի՞, հուսով եմ, որ աջակցել եք Ղարաբաղ գնալուն»: Մի բնակիչ էլ ասաց, որ կուսակցության ծրագիրն ընթերցել է ու եթե այդ խոստումների ¼-ն էլ կատարվի՝ կունենանք լավագույն քաղաքը:
Արաբկիրցիները ընտրությունների մասնակիցների ծրագրերը կարդացել են ու խճճվել, առաջարկները խառնել իրար՝ ով ինչ է առաջարկում եւ ինչու: Նրանցից մեկը ճշտեց. «Դուք չէի՞ք գրել, որ համատիրությունների սպասարկումը հանել»: Թանդիլյանը պատասխանեց. «Չէ, էդ մենք չենք գրել, ասել ենք՝ դուք չեք վճարելու, բայց սպասարկում լինելու է»:
Հռիփսիմե ՋԵԲԵՋՅԱՆ
