«Երեկ Ստեփանավանում հանդիպեցի Արցախի Հանրապետությունից եկած մեր հայրենակիցների հետ, նրանք խնդրեցին, որ կառավարությունը պարզաբանի հետեւյալ հարցը։ Խոսքը նախքան շրջափակումը Հայաստան եկածների մասին է եւ հետո եկածների, իրենք ստացել են կենսաթոշակ, երեխայի համար նպաստ, այլ տեսակի կենսաթոշակներ։ Ե՞րբ են այդ մարդիկ ստանալու իրենց կենսաթոշակներն ամբողջ ծավալով, որովհետեւ այդ մարդիկ շեշտում են, որ մեզ օգնություն պետք չէ, դուք մեզ աշխատանքի հնարավորություն տվեք եւ վերականգնեք մեր նպաստները»,- ԱԺ արտահերթ նիստում ֆինանսների փոխնախարարին հարցրեց «Հայաստան» խմբակցության պատգամավոր Գեղամ Նազարյանը։
Փոխնախարար Վահան Սիրունյանը պատասխանեց․ «Կենսաթոշակների հետ կապված, վստահաբար 2024 թվականին այդ հատկացումները կտրամադրվեն»։
Գեղամ Նազարյանը հավելեց․ «Մարդիկ անորոշության մեջ են։ Երկու առաջարկված պայման կա՝ կամ ընդունում եք Հայաստանի Հանրապետության քաղաքացիություն, կամ չեք ընդունում։ Չընդունելու դեպքում իրենք կենսաթոշակներ ստանալու են, թե՞ չեն ստանալու, նպաստներ ստանալու են, թե՞ ոչ։ Պետք է ավելի հստակ Արցախից եկած մեր քույրերին ու եղբայրներին ասենք, թե իրենց ինչ է սպասվում։ Խնդրում եմ դուք այս ամբիոնից ասեք՝ եթե մարդը չի ընդունում Հայաստանի Հանրապետության քաղաքացիություն, ինքը կարո՞ղ է ստանալ կենսաթոշակ ու նպաստ»։
Ֆինանսների փոխնախարարն ասաց, որ հարցի հասցեատերը աշխատանքի եւ սոցիալական հարցերի նախարարությունն է։
Կարդացեք նաև
Ռոզա ՀՈՎՀԱՆՆԻՍՅԱՆ
