Գյումրու կենտրոնական հատվածներից մեկում՝ Շիրակի մարզի ընդհանուր իրավասության դատարանի և Շիրակի մարզպետարանի շենքերի մոտակայքում կիսակառույց մի տարածք վերածել են ավտոշուկայի, որն, անխոս, փչացնում է Գյումրու տեսքը։
Aravot.am-ը քաղաքի գլխավոր ճարտարապետ Հենրիկ Գասպարյանից հետաքրքրվեց, թե կա՞ քաղաքային իշխանության թույլտվությունը քաղաքի կենտրոնական այդ հատվածում ավտոշուկա հիմնելու։
Հենրիկ Գասպարյանը պարզաբանեց, որ այդ տարածքը մասնավոր է, այն ի սկզբանե նախատեսված էր սպասարկման օբյեկտ կառուցելու համար, բայց քանի որ համասեփականատերերի միջև որոշակի խնդիրներ կան, հետևաբար և 2-3 հարկանի կառույցի շինարարությունը կիսատ է մնացել։
Կարդացեք նաև
Քաղաքի գլխավոր ճարտարապետը կարևորում է այն հանգամանքը, որ այդ տարածքը մաքրել են, այն վերածվել էր աղբանոցի՝ շուրջբոլորը գարշահոտություն տարածելով։
Նա ևս նշում է, որ վերջին շրջանում վաճառվող ավտոմեքենաների թիվը տվյալ տարածքում ավելացել է, նախկինում այդպես չէր․ հատուկենտ ավտոմեքենաներ էին շարված։
Նունե ԱՐԵՎՇԱՏՅԱՆ
