«Քաղաքացիական պայմանագիր» խմբակցության քարտուղար Արթուր Հովհաննիսյանն ԱԺ ճեպազրույցների ժամանակ անդրադարձավ հարցին, թե որքանո՞վ է իրատեսական խաղաղության օրակարգը, որի մասին իշխանություններն են խոսում։
«Խաղաղության գործընթացը առաջին օրվանից էլ բարդ խնդիրների է հանդիպում՝ թե Հայաստանից դուրս, թե նաեւ Հայաստանի ներսում։ Բայց մենք պետք է արձանագրենք, որ մեր իշխանության օրակարգը խաղաղության օրակարգն է, մենք այս օրակարգով շարժվելու ենք առաջ։ Մենք ամենասկզբում էլ հստակ հասկացել ենք եւ մեր ժողովրդին էլ հստակ փոխանցել ենք, որ սա հեշտ ճանապարհ չէ։ Մենք հանդիպում ենք այդ խոչընդոտներին հատկապես ագրեսիվ հռետորաբանության տեսանկյունից։ Եվ մենք էլ կիսում ենք վարչապետի այն մոտեցումը եւ հույսը, որ սա, ըստ էության, փորձ չէ փակուղի տանել խաղաղության օրակարգը։ Բայց անգամ եթե սա փորձ է Ադրբեջանի կողմից խաղաղության օրակարգը փակուղի տանելու, սա որեւէ կերպ մեզ հետ չի կանգնեցնելու մեր քաղաքականությունից, օրակարգից։ Մեր օրակարգը խաղաղության օրակարգն է, որը մենք մեր միջազգային գործընկերների հետ փորձում ենք առաջ տանել։ Խաղաղության օրակարգի այլընտրանքը պատերազմի օրակարգն է։ Հայաստանի Հանրապետությունը պատերազմի օրակարգ չունի, ունի խաղաղության օրակարգ, եւ մենք շարժվում ենք այս ճանապարհով»,- ասաց նա։
Հարցին, թե իսկ Ալիեւը չունի՞ պատերազմի օրակարգ, Արթուր Հովհաննիսյանը պատասխանեց․ «Չեմ կարող ձեր հարցին հստակ պատասխանել»։
Արձագանքեց ՔՊ խմբակցության պատգամավոր Արուսյակ Ջուլհակյանը․ «Ես կարծում եմ՝ շատ անշնորհակալ գործ է Ալիեւի օրակարգերը մեկնաբանելը։ Ալիեւը կարող ունենալ պատերազմի օրակարգ, կարող է ունենալ նախընտրական շրջանում աքլորանալու օրակարգ, այսինքն՝ ցանկացած օրակարգ կարող է ունենալ։ Այստեղ կարեւոր է, թե մեզ ինչն է հետաքրքրում այս ամբողջ գործընթացում, որն է ՀՀ օրակարգը եւ որն է ՀՀ շահը։ Հիմա ՀՀ շահից կոնկրետ պատմության այս շրջափուլում ի՞նչն է բխում, մեր խորին համոզմամբ՝ բխում է խաղաղությունը։ Եվ դրա համար մենք խաղաղության օրակարգն ենք առաջ բերել»։
Կարդացեք նաև
Հարցին, թե այսինքն՝ իրենք ձախողված չեն համարո՞ւմ խաղաղության օրակարգը, Ջուլհակյանը պատասխանեց․ «Մենք ոչ միայն առայժմ, այլ նաեւ չեմ կարծում, որ որեւէ փուլում այդ օրակարգը մենք պետք է համարենք ձախողված։ Մենք պետք է շարունակենք այդ ուղղությամբ մեր ջանքերը ոչ միայն մեր հարեւանի, այլ նաեւ մեր միջազգային գործընկերների հետ»։
Ռոզա ՀՈՎՀԱՆՆԻՍՅԱՆ
