Ակտիվ սպորտից հեռացած մարզիկին ուրիշ ի՞նչը կարող էր նման քայլի գնալ, եթե ոչ խոշորագույն մրցաշարի մասնակցելու մտադրությունը։ Այսպես մտածելու առիթ ծառայեց տարածված լուրն այն մասին, որ Լոնդոնի օլիմպիական խաղերի արծաթե մեդալակիր, աշխարհի ու Եվրոպայի չեմպիոն Արսեն Ջուլֆալակյանը փոխել է մարզական քաղաքացիությունը եւ հանդես է գալիս Արգենտինայի դրոշի ներքո։ Տեղեկությունը հաստատել է նաեւ Հայաստանի ըմբշամարտի ֆեդերացիայի գլխավոր քարտուղար Արայիկ Բաղդադյանը՝ միաժամանակ հիշեցնելով, որ ըմբիշը արդեն չորս տարի Հայաստանի դրոշի ներքո հանդես չի գալիս։ Ի դեպ, Արսեն Ջուլֆալակյանը հասցրել է օրեր առաջ մասնակցել Ֆրանսիայում կայացած Գրան Պրի մրցաշարին ու արծաթե մեդալ նվաճել։
Aravot.am-ը փորձեց մանրամասներ ճշտել, ինչպես ասում են, առաջին ձեռքից, սակայն ոչ Արսեն Ջուլֆալակյանի, որ նրա հոր՝ Լեւոն Ջուլֆալակյանի հետ, հեռախոսակապ հաստատել չհաջողվեց։ Ուստի, իրականությունից հեռու չէ ենթադրությունը, որ անվանի ըմբիշը, հնարավոր է, մեծ սպորտ վերադառնալու որոշում է կայացրել եւ Փարիզի օլիմպիական խաղերին մասնակցելու ցանկություն ունի։ Հետեւաբար, Արգենտինայի դրոշի ներքո հանդես գալով, նա միանգամայն ի վիճակի է ամերիկյան մայրցամաքից վարկանիշային մրցաշարում ուղեգիր նվաճել։
Աշոտ ՀԱԿՈԲՅԱՆ
