Ֆինանսների նախարար Վահե Հովհաննիսյանն այսօր լրագրողների հետ հանդիպման ժամանակ անդրադարձավ ԱՆԻՖ-ում կատարված փոփոխություններին։ Ինչով էր պայմանավորված ԱՆԻՖ-ի տնօրենների փոփոխությունը, արդյոք ղեկավար կազմը, որը բարձր աշխատավարձ էր ստանում, ցանկալի արդյունքներ չի գրանցել։
Այս առնչությամբ նախարարը նախ հիշեցրեց, որ կառավարությունը Արժույթի միջազգային հիմնադրամի հետ ուսումնասիրություն էր կատարել, հասկանալու՝ ինչպիսի քաղաքականություն է վարում կառավարությունը մասնավոր հատվածում, մասնավոր հատվածն ինչպիսի ներգրավվածություն պետք է ունենա եւ այլն․ «Անդրադարձ էր կատարվել ԱՆԻՖ-ին, որովհետեւ հասկացել էինք, որ ԱՆԻՖ-ի առաջ դրված խնդիրները շատ լայն են, այդքան էլ հստակ չեն եւ պետք է փոխվի ու ավելի հստակեցվի ԱՆԻՖ-ի մանդատը»։
Նախարարի ներկայացմամբ՝ տարբեր մեկնաբանություններ կան, օրինակ՝ մարդիկ կային, որոնք բարձր աշխատավարձ են ստացել, զգալի արդյունքներ են գրանցել, կա նաեւ հակառակ կարծիքը․ «Այստեղ վիճելու տեղ կա, քանի որ սահմանված չէ, թե այդ մարդիկ ինչ հստակ արդյունքներ պետք է արձանագրեին։ Հետեւաբար, կառավարությունը որոշեց, որ այդ արդյունքներն ու նպատակները, որոնք դրվում են ԱՆԻՖ-ի առաջ, պետք է շատ չափելի լինեն, հստակեցվեն եւ ռազմավարական առումով լինեն համահունչ կառավարության նպատակներին, տնտեսական քաղաքականությանը։ Դրանից հետո սա ենթադրում էր կառավարման մոդելի փոփոխություն, որն այժմ ընթացքի մեջ է»։
Կարդացեք նաև
Նելլի ԲԱԲԱՅԱՆ
