Հայաստանի դեմոկրատական կուսակցության փոխնախագահ Նարինե Դիլբարյանը «Հայելի» ակումբում անդրադառնալով Հայոց բանակի կազմավորման 32-րդ տարեդարձի օրը ոստիկանական ուժերի ուղեկցությամբ Հայաստանի քաղաքական իշխանության վերնախավի՝ Եռաբլուր կատարած այցին եւ նույն օրը ՄՀՀ-ում Նիկոլ Փաշինյանի հայտարարությանը, թե բանակ են վերակառուցում եւ միլիարդների արժողությամբ զենք է ձեռք բերվում, ասաց. «Անկեղծ ասած, ես հերթական անգամ մեծ հարված ստացա՝ տեսնելով, որ պետությունն այդպես խմբավորված հավաքվեց ՄՀՀ-ում եւ իբրեւ նշեց Հայոց Բանակի 32-րդ տարեդարձը:
Բայց իրականում չհնչեց որեւէ պետական պաշտոնական ուղերձ, որը լինելու էր ուղղված ոչ միայն ՄՀՀ-ում հավաքված ինչ-որ անհատ զինվորականների, այլ լինելու էր ուղղված համայն հայությանը, միջազգային ասպարեզին, որ Հայոց բանակը իբրեւ պետականության հիմնասյուն ոչ միայն վերականգնելու ենք, այլեւ ունենք առանձնահատուկ պետական վերաբերմունք:
Այսինքն, այդ միջոցառումը, ինչպես նաեւ Եռաբլուրում հայտնվելը իրականում ցույց տվեց, թե ինչպիսի պետական ինստիտուտների հանդեպ ճգնաժամային իրավիճակ կա: Եվ ես կուզեի կապել մեր զինված ուժերի այդ իրողությունը զինանշանի փոփոխության, օրհներգի փոփոխության եւ վերջին գույժը՝ Սահմանադրության փոփոխության հետ:
Յուրաքանչյուր պետություն, իսկ պետությունը քաղաքագիտական հասկացություն է, բնորոշվում է իր հիմնական ատրիբուտներով: Դրանք են դրոշը, զինանշանը, օրհներգը, բանակը, գործադիր. օրենսդիր, դատական իշխանությունները եւ, իհարկե, քաղաքացին, որը ըստ պետության դասական սահմանման, իշխանություն ձեւավորող հիմնական ուժն է: Պետք է արձանագրենք, որ 2024 թվականին սկսվում է բոլոր ինստիտուցիոնալ հիմնային իրողությունների զրոյացման գործընթաց»:
Կարդացեք նաև
Նարինե Դիլբարյանն ընդգծեց, որ այն պարագայում, երբ Ալիեւը եւ ադրբեջանական քարոզչամեքենան հայկական տեղանունները հնչեցնում են ադրբեջանական տարբերակով ու արտասանությամբ, հույս ունենալ ու մտածել՝ ոչինչ, որ փոխում ենք օրհներգը, զինանշանը, ոչինչ, որ հրաժարվում ենք Անկախության հռչակագրից ու դրա արդյունքում կստանանք խաղաղություն, առնվազն անհեթեթություն է: «Իսկ իրականում դա նշանակում է ՝ կործանել Հայոց պետականությունը եւ 21-րդ դարում, ըստ էության, քաղաքացիական այն հասարակությանը, որը պայքարում է պետական նպատակների, ժողովրդավարության համար, բոլորին դարձնել փախստական»,-ասաց քաղաքական գործիչը:
Աշոտ ՀԱԿՈԲՅԱՆ
