«Փաստինֆո». Դատախազությունը դեմ է 44-օրյա պատերազմում զոհված զինծառայողների ծնողների նկատմամբ «Եռաբլուր» զինվորական պանթեոնում ուժի կիրառած ոստիկանների նկատմամբ քրեական հետապնդմանը ու բողոքարկել է քրեական վարույթի վերաբացելու որոշումը։
Հիշեցնենք, որ 2022թ. սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա իրենց որդիների մահվան մեղավորը։ Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։ Քրեական գործը տևական ժամանակ «քնեցվեց», արդյունքում՝ դատախազությունը որոշում կայացրեց ոստիկանության ծառայողների նկատմամբ քրեական հետապնդում չհարուցելու մասին, օրեր անց՝ գործի վարույթը կարճվեց։
Տուժող կողմը չի համաձայնել այս որոշումների հետ և վիճարկել է դրանք դատական կարգով։ Հակակոռուպցիոն դատարանը՝ դատավոր Մերի Մոսինյանի նախագահությամբ, բավարարել էր տուժող կողմի բողոքը և, ըստ այդմ, քրեական վարույթը պետք է վերաբացվեր և վարույթն իրականացնող մարմինը պետք է վերացներ դատարանի կողմից արձանագրված խախտումները։
Նշենք, որ տուժող կողմն, այնուամենայնիվ, վերաբացման պարագայում էլ օբյեկտիվ քննության ակնկալիքներ առանձնապես չունի, կարծում են՝ ձևական քննություն կիրականացվի և կարճ ժամանակ անց՝ կրկին կկարճվի։ Այդուհանդերձ, «Փաստինֆո»-ն տեղեկացավ, որ դատախազությունն արդեն բողոքարկել է դատարանի այս որոշումը՝ պահանջելով բեկանել այն։
Կարդացեք նաև
Իզաբել Սահակյան
