«Նիկոլ» եւ «իշխանություն» գրառումներով մի մեծ դույլ սառցակտոր՝ կառավարության շենքի դիմաց: Այս յուրօրինակ ցույցի նախաձեռնողները «Տավուշը հանուն հայրենիքի» շարժմանը աջակցող մի խումբ երիտասարդներ էին:
«Սառցակտորները բերել ենք, ցույց տալու համար, որ ինչպես այս սառցի կտորները չդիմանալով արեւի ջերմությանը, հալվում են, այնպես էլ այս իշխանությունները չեն դիմանալու ժողովրդական արդար բողոքի ալիքին»,- այսօր կառավարության շենքի դիմաց իրենց ցույցի ատրիբուտներն այսպես ներկայացրին նախաձեռնողները:
Նրանցից մեկի խոսքով. «Այն, ինչ տեւական ժամանակ տեղի է ունենում մեր երկրում, գործող իշխանությունների կործանարար քաղաքականության ընթացքում է: Թշնամու օգտին չդադարող միակողմանի զիջումները հակասում են ե՛ւ մարդկային առողջ մտքին, ե՛ւ բովանդակությանը, ե՛ւ պետականությանը: Վտանգի տակ են դրվում մեր պետականության հետագա գոյությունը եւ մեր սերունդներին հայրենիք եւ անկախ պետություն ժառանգելու մեր պարտականությունը»:
Կարդացեք նաև
Ցուցարարի խոսքով, այս օրերին երկրում ծավալված համաժողովրդական շարժումն այդ ընթացքի դեմն առնելու լավագույն եւ անփոխարինելի միջոցն է. «Դա գիտակցելով՝ այս շենքում նստած պետականաքանդ պաշտոնյաները պետական ռեսուրսները եւ առավելագույն ջանքերը ներդնելով՝ փորձում են համոզել մեր հասարակության որոշ շերտերի, թե շարժումը մարել կամ մարման փուլում է գտնվում»:
Երիտասարդները նաեւ իրազեկեցին քաղաքացիներին հունիսի 9-ին, երեկոյան 18:30-ին Հանրապետության հրապարակում սպասվող հավաքի մասին:
Քաղաքացիներին մոտեցան նաեւ ոստիկաններ, հետաքրքրվեցին նրանց ինքնությամբ եւ ամեն ինչ պարզելով հեռացան:
Արփինե ՍԻՄՈՆՅԱՆ
