«Վերջին տարիներին ՀՀ-ի և ԵՄ-ի միջև հեղափոխություն է եղել, հիմա ՀՀ-ԵՄ հարաբերություններն ավելի ամուր են, քան երբևէ։ Մենք կշարունակենք այս ուղղությամբ աշխատանքներն ու ջանքերը։ Բայց տեսնում ենք, որ աշխարհաքաղաքականությունն ավելի խճճված է դառնում, նայեք մեր տարածաշրջանին»,-«Երևանյան երկխոսություն» միջազգային երրորդ համաժողովի Եվրոպան իշխանության և գերիշխանության նոր ձևերի միջև» թեմայով պանելային քննարկման ժամանակ վստահեցրեց ՀՀ Անվտանգության խորհրդի քարտուղար Արմեն Գրիգորյանը։
Նա վստահեցրեց՝ ՀՀ-ի՝ վերջին տարիների հիմնական քաղաքականությունը դիվերսիֆիկացիան է․ «Այն ճանապարհը, որով Հայաստանի անվտանգությունն էր ապահովվում այլոց կողմից, կոլապսի ենթարկվեց 2020-ի պատերազմից հետո։ Ուստի մենք պետք է փնտրեինք այլ ուղիներ, թե ինչպես կարող ենք ապահովել մեր անվտանգությունը։ Դրանից մեկը հավասարակշռված արտաքին քաղաքականությունն էր, դիվերսիֆիկացիան։ Մենք մեկ դերակատարի նկատմամբ ունեինք դժգոհություն, տեսանք, որ դա մարտահրավեր է մեր անվտանգության համար։ Տեսանք, որ կան նաև այլ հնարավորություններ։ Այժմ ՀՀ-ԵՄ հարաբերություններն ավելի ուժեղանում են նաև դիվերսիֆիկացիայի շնորհիվ»։
Խոսելով տարածաշրջանային զարգացումների մասին՝ նա ասաց․ «Տարածաշրջանում աշխարհաքաղաքականություն ենք փոխում։ Մենք ապրում էինք հակամարտության տարածաշրջանում, որը վերափոխվում է խաղաղության տարածաշրջանի, երբ արդեն ԵՄ ղեկավարությունից է կոչ հնչում ձեռներեցներին ներդրումներ անել այս տարածաշրջանում։ Ադրբեջանի հետ խաղաղության գործընթացի ինստիտուցիոնալացումը կարևոր է Հարավային Կովկասը խաղաղության կղզի դարձնելու համար։ Այս ճանապարհին մեզ համար ԵՄ-ն կարևոր գործընկեր է։ Մեզ համար կարևոր են նաև մյուս բոլոր գործընկերները»։
Կարդացեք նաև
«Երևանյան երկխոսություն» միջազգային երրորդ համաժողովն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
Լուսանկարը՝ «Երևանյան երկխոսություն» միջազգային երրորդ համաժողովի ֆեյսբուքյան էջից
