Աստանայում ընթանում է Եվրասիական տնտեսական բարձրագույն խորհրդի նիստը՝ ՌԴ նախագահ Վլադիմիր Պուտինի գլխավորությամբ։ Նիկոլ Փաշինյանը հայտարարել էր, որ չի մասնակցի մայիսի 28-29-ին տեղի ունեցող ԵԱՏՄ գագաթնաժողովին, քանի որ քարոզարշավի պատճառով գտնվում է արձակուրդում։
Նեղ ձևաչափով հանդիպմանը մասնակցել են նաև Ղազախստանի, Բելառուսի, Ղրղզստանի ղեկավարները և ՀՀ փոխվարչապետ Մհեր Գրիգորյանը։
«Պետք է էլ ավելի ակտիվացնենք աշխատանքները, ոչ թե զուտ նիստեր լինեն, այլ արդյունավետությունը զգացվի։ Մենք միությունը ստեղծում ենք՝ հնարավոր ռիսկերը չեզոքացնելու և ինչ-ինչ պատճառներից ձերբազատվելու համար»,- Եվրասիական տնտեսական բարձրագույն խորհրդի նիստի ժամանակ նշեց Բելառուսի նախագահ Ալեքսանդր Լուկաշենկոն։
Նրա ձևակերպմամբ՝ Արևմուտքն անընդհատ տանում է ինչ-որ մեկին մեկուսացնելու քաղաքականություն, փորձում է պատժամիջոցներ մտցնել, առաջ է տանում անջատողականության գիծը, սակայն ԵԱՏՄ-ն ունակ է այդ ամենին դիմակայելու։ Նրա ձևակերպմամբ՝ «Պետք է մեր միությունն արդյունավետ դարձնել, հավատացեք իմ փորձին, դրա համար պետք է վերլուծենք մեր կատարած աշխատանքները, տեսնենք, թե ինչն է մեզ խանգարում աշխատել, ով ինչ հետաքրքրությունների շրջանակում պետք է աշխատի։ Իհարկե, բոլորը պետք է աշխատեն, սակայն առաջնահերթությունը պետք է լինի ԵԱՏՄ-ի արդյունավետությունը, որպեսզի այս միություն ընդգրկվելուց պետությունները հասկանան, թե ինչ կարող են ստանալ այս միության մեջ»։
Կարդացեք նաև
Մանրամասն՝ տեսանյութում
ՀՀ փոխվարչապետ Մհեր Գրիգորյանը նշեց, որ հայկական կողմը քանիցս հաստատել է Եվրասիական տնտեսական միության շրջանակներում փոխշահավետ համագործակցության հանձնառության մասին՝ հօգուտ մեր երկրների և տարածաշրջանի տնտեսական կայունության և տնտեսական զարգացման ապահովման։ «Հայաստանի Հանրապետությունը մտադիր է այսուհետ ևս բարեխղճորեն մասնակցել ԵԱՏՄ աշխատանքներին՝ փոխադարձ հարգանքի, իրավահավասար գործընկերության և ԵԱՏՄ անդամ պետությունների բոլոր ազգային շահերը հաշվի առնելու հիման վրա»,- նշեց ՀՀ փոխվարչապետը։
Նա ընդգծեց ԵԱՏՄ ֆորումի թեմատիկայի արդիականությունը, նշեց, որ արհեստական բանականության ոլորտում գլոբալ մրցակցությունը դառնում է ոչ միայն արդյունավետության և արտադրողականության բարձրացման հարց, այլև պետությունների տնտեսական և տեխնոլոգիական ինքնիշխանության կարևորագույն գործոն։ Մհեր Գրիգորյանի խոսքով՝ առևտրի ազատականացումը տնտեսական ինտեգրացման ամենակարևոր շարժիչներից մեկն է մնում ԵԱՏՄ շրջանակում, ի թիվս այլնի՝ անդրադարձավ նաև տրանսպորտային կապերի դիվերսիֆիկացմանը, ապրանքաշրջանառության զարգացմանը, բիզնեսի համար ավելի նպաստավոր պայմանների ստեղծմանը։
Մանրամասն՝ տեսանյութում
ՌԴ նախագահի օգնական Յուրի Ուշակովը հայտնել է, որ ԵԱՏՄ գագաթնաժողովի ընթացքում քննարկվել է Հայաստանի թեման, իսկ ՀՀ փոխվարչապետին փոխանցվել է ԵԱՏՄ չորս առաջնորդների հայտարարությունը։
Եվրասիական տնտեսական բարձրագույն խորհրդի նիստն ամբողջությամբ
Գոհար ՀԱԿՈԲՅԱՆ
