«Մոտակա 10 տարում չեն կարողանալու արտահանել Եվրոպա ոչինչ: Շատ դժվար ընթացակարգեր են: Եվրոպացի ֆերմերները ընդհանրապես չեն թողնում, որ որեւէ մեկը մուտք գործի այդ շուկա»,- այսօր Տավուշի մարզում լրագրողների հետ զրույցում ասաց «Հայաստան» դաշինքի վարչապետի թեկնածու Ռոբերտ Քոչարյանը:
Մեկնաբանելով իշխանության ներկայացուցիչների պնդումները, թե ԵԱՏՄ անդամ մյուս երկրները սատարում են ՀՀ՝ ԵՄ անդամակցությանը, Քոչարյանն այսպես արձագանքեց. «Ոչ թե սատարում են, այլ ասում են՝ կողմնորոշվի՝ կամ այստեղ ես, կամ՝ այնտեղ: Ռուսաստանի ասածն այն է, որ պատրաստ չեն ֆինանսավորել ՀՀ ճանապարհը դեպի ԵՄ, գնացեք՝ ոնց ուզում եք այդ ճանապարհը ֆինանսավորեք, սա վերջնագիր է ՀՀ համար: Գյուղատնտեսությունը ոչ թե անկում է ապրելու, այլ աղետ է լինելու գյուղատնտեսության համար: Գյուղացիները պետք է որոշեն: Հիմա ասում եք՝ ինչ անեն՝ քվեարկեն Նիկոլի դեմ: Այս մարդը երկրորդ աղետն է բերում»:
Ըստ Քոչարյանի` ուղղակի սպանում են ՀՀ գյուղատնտեսությունը, ենթադրաբար թուրքական ապրանքների համար ճանապարհ բացելու նպատակով, այլ բացատրություն սրան, ըստ Քոչարյանի, չկա:
Կարդացեք նաև
Անդրադառնալով հունիսի 1-ին Պուտին-Փաշինյան հեռախոսազրույցին՝ Քոչարյանը կարծիք հայտնեց, որ դա հավանաբար Փաշինյանի ծննդյան օրով է պայմանավորված, որովհետեւ այդ զրույցից մի քանի ժամ հետո նոր սահմանափակումների մասին հայտարարվեց. «Մրգային մի խումբ սահմանափակվեց… Եթե նման զանգերը ունենալու են այսպիսի հետեւանքներ, պետք է դիմենք Փաշինյանին, որ ոչ մեկի հետ չխոսի»:
Արփինե ՍԻՄՈՆՅԱՆ
