«Այս դատական նիստի ընթացքում մեղադրանքից քարը քարին չի թողնվել։ Նման փուչ մեղադրանք դժվար էր պատկերացնել նման գործով։ Եթե նույնիսկ այս հետապնդումները պետք է կազմակերպեին, գոնե մի քիչ ավելի լուրջ մեղադրանք մտածեին, որովհետև կարծում եմ՝ այստեղ հանցագործության դեպք չկա։ Ոչ թե բիզնես վեճ է, այստեղ նույնիսկ բիզնես վեճ էլ չկա։ Ուղիղ իմաստով պարոն Ծառուկյանը պետք է ճանաչվեր տուժող, բայց այս պարագայում տուժողին տվել են մեղադրյալի կարգավիճակ»,- այսօր լրագրողների հետ զրույցում ասաց ԲՀԿ առաջնորդ Գագիկ Ծառուկյանի պաշտպաններից Էմին Խաչատրյանը։
Հարցին, թե Գագիկ Ծառուկյանին պատկանող մի շարք կազմակերպություններում իրականացված խուզարկություններն ինչով են հիմնավորել, Խաչատրյանը պատասխանեց. «Այս քաղաքական հետապնդումների ֆոնին տարբեր գործերով բոլոր վարույթներն ակտիվացան մեկ օրում։ Նույնիսկ 2020 թվականից Կոտայքի քննչականում քննվող գործն էլ ակտիվացավ։ 2020 թվականի գործով… Բոլոր գործերն ակտիվացան մեկ օրում։ Ո՞վ կպատասխանի մեզ՝ ինչո՞ւ։ Բոլորն ասում են՝ հիմա զբաղված ենք զուտ իրավական գործընթացներով։ Կզարմանայինք, եթե այլ կերպ մեկնաբանեին»։
Հիշեցնենք, որ երեկվանից Ծառուկյանի առանձնատանն ու նրան պատկանող ընկերություններում խուզարկություններից հետո, Գագիկ Ծառուկյանին մեղադրանք է առաջադրվել ու այսօր առավոտից Երևանի ընդհանուր իրավասության դատարանը քննում է Ծառուկյանի նկատմամբ կալանքը որպես խափանման միջոց ընտրելու վարույթ իրականացնող մարմնի ներկայացրած միջնորդությունը:
Արփինե ՍԻՄՈՆՅԱՆ
