«Պարոն Ռուբինյան, մեր խմբակցությունը դեմ է քվեարկելու Ձեզ։ Կուզեի՝ մեր հարաբերությունները Թուրքիայի հետ զարգանան այն դիտանկյունից, որ մեր խելացի երիտասարդներն Ադանան որպես քյաբաբ չճանաչեին, այլ իմանային, որ մեր հայրենիքի մասն է։ ՀՀ-ի չէ, այլ հանրապետության մասն է, բայց իմ հայրենիքի մի մասն է»,-ԱԺ նիստի ժամանակ իր ելույթում հայտարարեց «Ուժեղ Հայաստան» խմբակցության ղեկավար Նարեկ Կարապետյանը՝ անդրադառնալով Ռուբեն Ռուբինյանի հայտարարություններին։
Նա առաջարկեց երեք խնդիր, որը պետք է լուծի այս խորհրդարանը․ «Մեր երկիրը մեկ-երկու տարվա ընթացքում ունի մի քանի մարտահրավեր՝ առաջինը՝ Ադրբեջանի հետ խաղաղության պայմանագիրն է։ Այն առանցքային է մեր երկրի զարգացման համար և մեր հայրենակիցներին՝ մերոնց հետ բերելու համար Բաքվի բանտերից։ Խաղաղության պայմանագիրը մեր երկրի առաջ ծառացած ամենակարևոր խնդիրներից մեկն է։ Հայ քաղաքական միտքը պետք է կարողանա լուծել այդ հարցը՝ մեկ կարևոր հարց լուծելով զուգահեռ, որ թույլ չտրվի Ադրբեջանին հնարավորություն ստանալ խաղաղության պայմանագրի շրջանակում ապահովել այնպիսի պայմաններ, որ ունենա ժողովրդագրական ներկայություն մեր երկրում։ Մեր քաղաքականության նպատակն է լուծել հարցն այնպես, որ ունենանք խաղաղություն, բայց ունենանք նաև ժողովրդագրորեն անվտանգ Հայաստան։ Իմ առաջարկն է՝ եկեք ընդունենք օրենք, մենք դա անվանում ենք հակասաֆարովյան օրենք, որով ուղղակի իրավունք չենք տալիս ադրբեջանցիներին տասն օրից ավել գտնվել մեր երկրում և ունենալ գույք կամ հող այստեղ։ Դրանով մեր հարցերը սպառվում են։ Մենք առաջարկ կանենք առաջիկայում, և իրար հետ կարող ենք այդ հարցը մեր քաղաքական օրակարգից հանել։ Թուրքիան նման օրենք ունի նաև մեր մասին»։
Կարդացեք նաև
ԱԺ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
