Արմեն Գրիգորյանին ԱԽ քարտուղարի պաշտոնից հեռացնելու և այլ պաշտոնի տեղափոխելու հարցը «Քաղաքացիական պայմանագիր» կուսակցության վարչությունում չի քննարկվել. խորհրդարանում լրագրողների հետ զրույցում ասաց իշխող ուժի պատգամավոր Արմեն Խաչատրյանը (լուսանկարում)։ «Մենք այդ հարցը չենք քննարկել, ընդհանրապես չենք քննարկել Անվտանգության խորհրդի քարտուղարի պաշտոնից ազատման, այլ պաշտոնի տեղափոխման, այլ պաշտոնում այլ անձի նշանակման հարց»,— ասաց նա։Մամուլում տեղեկություններ կան, որ Արմեն Գրիգորյանը նշանակվելու է Միացյալ Թագավորությունում ՀՀ դեսպան։
Լրագրողի հարցին՝ ձեզ համար դա անակնկա՞լ էր, բանախոսը պատասխանեց. «Գուցե և անակնկալ չէր, բայց այդ հարցը մենք չենք քննարկել։ Կներեք, բայց ես ամեն ինչից անակնկալի չեմ գալիս, շատ դժվար եմ անակնկալներ ունենում»։
Ճշտող հարցին, թե ո՞րն է Արմեն Գրիգորյանի պաշտոնանկության պատճառը, ՔՊ-ական պատգամավորը պատասխանեց. «Տեսեք, Արմեն Գրիգորյանը քանի՞ տարի է, որ Անվտանգության խորհրդի քարտուղար է՝ երևի 5, 6, վեցից ավելի տարիներ Անվտանգության խորհրդի քարտուղար է: Սովորաբար ինչ-որ մի ժամկետ լրանալուց հետո պաշտոնյաները փոփոխվում են, փոխարինվում են այլ պաշտոնյաներով, տեղափոխություններ են լինում: Գուցե դա Արմեն Գրիգորյանի ցանկությունն է եղել՝ այլևս այլ պաշտոնի անցնել, ես չեմ կարող ասել այդ մասին: Բայց, հարգելի լրագրողներ, շատ նորմալ է, որ մարդը 6-7 տարի ինչ-որ մի պաշտոնում աշխատելուց հետո այլ պաշտոնի է տեղափոխվում. դա նորմալ է և, կարծում եմ, նույնիսկ երբեմն անհրաժեշտ»։
Նելլի ԳՐԻԳՈՐՅԱՆ
