Բայց ինքը նախընտրում է պաուզա վերցնել«Արմեն Գրիգորյանին աշխատանք եմ առաջարկել վարչապետի աշխատակազմում: Ինքն ընդհանրապես պետական ծառայության մեջ առաջիկայում նախընտրում է պաուզա վերցնել: Ես ըմբռնումով ու հարգանքով եմ վերաբերվում որոշմանը»,- ճեպազրույցի ժամանակ ասաց Նիկոլ Փաշինյանը՝ անդրադառնալով Արմեն Գրիգորյանին ԱԽ քարտուղարի պաշտոնից ազատելու որոշմանը:
«Ես ցանկացել եմ, որ նա ներգրավված մնա պետական աշխատանքում, բայց այս փուլում պարոն Գրիգորյանը նախընտրում է դադար վերցնել, ինչին հարգանքով եմ վերաբերվում»,- ասաց նա:
Փաշինյանը նաև տեղեկացրեց, որ ինքն է կայացրել Արմեն Գրիգորյանին պաշտոնից ազատելու որոշումը. «Այնպես չէ, որ ես Արմեն Գրիգորյանի աշխատանքից դժգոհ եմ եղել, բայց այնպես էլ չէ, որ ինքս իմ աշխատանքից այնքան գոհ եմ, որ համարում եմ կատարյալ: Կարծում եմ, որ այդպիսի որոշումները նորմալ են քաղաքականության մեջ. դա հայեցողական պաշտոն է, այդ հայեցողությունը վարչապետինն է»,- ասաց նա:
Նշենք, որ Նիկոլ Փաշինյանի որոշմամբ Արմեն Գրիգորյանն ազատվել է ԱԽ քարտուղարի պաշտոնից, մեկ այլ որոշմամբ այդ պաշտոնում նշանակվել է ԱԺ նախկին նախագահ Ալեն Սիմոնյանը:
Կարդացեք նաև
Ճեպազրույցն ամբողջությամբ․
Գոհար ՀԱԿՈԲՅԱՆ
