Aravot.am-ի տեղեկություններով՝ Շիրակի մարզային քննչական վարչությունում քննվում է Ազգային ժողովի աշխատակցուհիներից մեկի բողոքն առ այն, որ իրեն անհայտ անձը փետրվարից մինչև օգոստոս ընկած ժամանակահատվածում բազալտե քարով ցանկապատել ու լրիվ այլ տապանաքար է տեղադրել Գյումրու թիվ 1 գերեզմանատանը հուղարկավորված իր տատի, պապի ու պապիկի հոր գերեզմանին։ Անձը, տեսնելով այս ամենը ու հայտնաբերելով, որ պապի տապանաքարը բացակայում է, այն հանված է ու տեղը մեկ այլ՝ կարմիր գույնի տապանաքար է տեղադրված, հաղորդում է ներկայացրել ոստիկանության Կումայրի բաժին։
Ձեռնարկած օպերատիվ միջոցառումների արդյունքում պարզվել է, թե ով է կատարել ցանկապատումը։ Ըստ իրավապահների, կասկածվում է 47-ամյա Ա․Ս․-ն, որն աշխատանք չունի։ Հանգամանքները պարզվում են։
Ոստիկանությունը կազմված փաստաթղթերն ուղարկել է Շիրակի մարզային քննչական վարչություն։
Նշենք, որ Գյումրու թիվ 1 գերեզանատունը Գյումրու ամենահին հանգստարանն է, ներառված է «Կումայրի արգելոց պատմամշակութային թանգարանի» մեջ։ Այն վաղուց համարվում է կիսափակ, այստեղ ազատ հողատարածքներ չկան, հետևաբար և նոր հողատարածքներ անհնար է հատկացնել, թույլատրվում է հուղարկավորություններ կատարել միայն գոյություն ունեցող ընտանեկան գերեզմաններում։
Կարդացեք նաև
Ի դեպ, այստեղ մի պահ շատ հաճախակի էին տեղի ունենում գերեզմանագողություններ , գերեզմանները զավթելու դեպքեր։
