Ֆրանսիական գիտա-հանրամատչելի «Ciel et Espace» («Երկինք և Տիեզերք») ամսագրում լույս է տեսել Մելանի Շալուլոյի ակնարկային հոդվածը Բյուրականի աստղադիտարանի վերաբերյալ և հարցազրույց երիտասարդ հայ աստղագետ, հայ-ֆրանսիական համագործակցության ասպիրանտ Սաթենիկ Ղազարյանի հետ: Բյուրականի աստղադիտարանը ներկայացված է որպես նախկին Խորհրդային Միության կարևորագույն աստղագիտական կենտրոններից մեկը, որտեղ, չնայած ներկայից լուրջ ֆինանսական դժվարություններին, շարունակում են զարգացնել ավանդական գիտական ուղղությունները և բարձր պահել միջազգային հեղինակությունը: Հոդվածի հեղինակը մասնավորապես զրուցել է տնօրեն Հայկ Հարությունյանի հետ և նրա խոսքերից ներկայացրել աստղադիտարանի վերջին նորությունները և նախաձեռնությունները: 24-ամյա Սաթենիկ Ղազարյանն ընդունվել է Բյուրականի աստղադիտարանի ասպիրանտուրան, այնուհետև շահել է Հայաստանում ֆրանսիական դեսպանատան ծրագրով համատեղ ասպիրանտուրայի դրամաշնորհը և 3 տարի շարունակ (2010-2012թթ.) տարեկան 6-ական ամսով իր գիտական գործունեությունն է անցկացնում Փարիզի արվարձաններում գտնվող Մեդոնի հանրահայտ աստղադիտարանում: Նրա թեման է A և B տիպի աստղերի քիմիական բաղադրության ուսումնասիրությունը. ֆրանսիական «Corot» արտամթնոլորտային աստղադիտակով ստացված տվյալների հիման վրա Սաթենիկն ուսումնասիրում է աստղերի սեյսմալոգիան: Նրա համաղեկավարներն են Հայկ Հարությունյանը` հայկական և Ժորժ Ալեսյանը` ֆրանսիական կողմից:
Հայկական աստղագիտական ընկերություն
