Փտած, կիսաքանդ պատեր, ժանգոտ, փակ դարպասներ: Սրանք նկարիչ-դիզայներ Շարիս Կարապետյանի լուսանկարների հիմնական նյութն են:
Այսօր «Դալան» ցուցասրահում կազմակերպվել էր Շարիս Կարապետյանի լուսանկարների ցուցահանդես-վաճառք:
Aravot.am-ի հետ զրույցում նկարիչն ասաց, որ իր ուշադրությանն են արժանանում այնպիսի դռները, որոնք շատերի համար նկատելի չեն: Լքված, չխնամված դռներն, ինչպես Շարիս Կարապետյանն է ասում, իր համար հատուկ նշանակություն ունեն եւ օժտված են մեծ էներգիայով. «Դռները միշտ շարժման մեջ են եւ ներկայացնում են կյանքի դրական ու բացասական կողմերը: Դուռն ինձ համար, իր մեջ, միստիկ մի բան ունի` մտածում ես բացես-չբացես, այնտեղ ի՞նչ կլինի, ո՞ւր կտանի այդ դուռը հայտնի չէ»:
Կարդացեք նաև
Լուսանկարների նյութը Շարիսը գտել է Երեւանում, հայաստանյան գյուղերում: Նկարիչը ներկայացրել էր 13 գործ, որոնք ոչ թե թղթի վրա էին, այլ` վերատպած` կտավին: Շարիս Կարապետյանը շատ նմանություն է գտել հայկական եւ Իտալիայի` մասնավորապես` Սիցիլիայի գյուղերի տների դռների մեջ:
Շարիսն ապրում եւ աշխատում է Փարիզում, սակայն 93 թվականից սկսած իր գործերը ցուցադրում է Հայաստանում:
«Ժառանգություն» կուսակցության առաջնորդ Րաֆֆի Հովհաննիսյանը կարծում է, որ Շարիսի փակ եւ բաց «դռները» սպառնալիք, ահազանգ ու մարտակոչ են իրենց մեջ պարունակում:
Լուսինե ԲՈՒԴԱՂՅԱՆ